QR Tuńǵysh Prezidenti - Elbasy Nursultan Nazarbaev «Samuryq-Qazyna» ulttyq ál-aýqat qorynyń jumysyna baǵa berdi, dep habarlaidy QazAqparat.
«Samuryq-Qazyna» qoryn dúniedegi eń úzdik tájiribege súiene otyryp jasadyq. Onyń negizgi maqsaty – ulttyq ekonomikanyń básekege qabilettiligin arttyrý, ulttyq kompaniialar aktivteriniń baǵasyn kóterý boldy. Qor óziniń missiiasyn oryndap keledi. Ásirese sońǵy jyldary, kúrdeli kezeńderde ekonomikamyzdyń naqty qoldaýshysy bolyp, zor úles qosty. Meniń tapsyrmammen «Samuryq-Qazyna» qory qurylǵanda oǵan elimizdiń eń iri aktivteri endi. Bul qadam olardyń qunyn qymbattatyp, kiristi arttyryp, osy kompaniialardaǵy ónim shyǵarý kólemin kóbeitti», - dedi N. Nazarbaev «Samuryq-Qazyna» ulttyq ál-aýqat qoryn basqarý jónindegi keńestiń otyrysynda.
Byltyrǵy jyldyń qorytyndysy boiynsha, qor barlyq ónerkásiptik jáne qarjylyq baǵytta oń nátije kórsetti. Byltyrǵy tabys kólemi – 1,2 trillion teńgeni, biýdjetke tólem 1,1 trillion teńgeni quraǵan.
«Jalpy, 2018-2019 jyldary qor memlekettik biýdjettiń kirisin salyq tólemi retinde 2,2 trillion teńgege arttyrdy. Mindetterdi tóleý aiasynda Ulttyq qorǵa 460 milliard teńge aýdaryldy. Bul – óte jaqsy kórsetkish. Munai baǵasynyń arzandaýy, jolaýshylar men júk tasymalynyń azaiýy, elektr energiiasyn jetkizýdiń tómendeýi qor kompaniialarynyń óndiristik jáne qarjylyq kórsetkishterine keri áser etti. Men «Samuryq Qazyna» basshylyǵy kótergen operatsiialyq jáne ákimshilik shyǵyndardy ońtailandyrý jónindegi bastamalardy qoldaimyn. Munyń qanshalyqty durys ári tiimdi ekenin slaidtan kórdińizder. Onyń ústine, bul elimizdegi IT indýstriiasyn jetildirýge múmkindik beredi», - dedi Elbasy.
Tuńǵysh Prezidenttiń aitýynsha, qor qompaniialary karantindik shekteýler alynǵannan keiin de qashyqtan jumys isteýdi jalǵastyrý jobalaryn júzege asyrýǵa kirisip ketti. Bul, ofiske, transporttyq, tehnikalyq jumysshylarǵa tólenetin jáne basqa da shyǵyndy azaitýǵa kómektesedi.
«Qabyldanǵan sharalar arqyly qor óndiristik baǵyttaǵy qyzmetkerlerdi jappai qysqartýǵa jol bergen joq. Bul – óte mańyzdy. Daǵdarysqa alǵash tap bolyp otyrǵan joqpyz ǵoi. Buǵan deiin 1998 jylǵy daǵdarysty da, 2008-2009 jyldardaǵy álemdik daǵdarysty da eńserdik. Men búkil kompaniialardan jumys ornyn, adamdardy saqtap qalýdy suradym. Tipti, qazir aqsha tólemesek te, jumys ornyń saqtalady deseń, osynyń ózi – úlken qoldaý. Ol qaita oralyp, kompaniiada jumys isteitinin biledi. Bul mysaldar basqalarǵa da úlgi bolýy tiis. Osy tásildi barlyq jerde qoldaný kerek», - dedi N. Nazarbaev.
«Sońǵy eki jyl kóleminde qor syrtqy qaryzynyń 8 milliard teńgesin merziminen buryn tóledi. Bul valiýta kýrsynyń ózgerýine bailanysty joǵalýy múmkin 1 trillion teńgeni únemdeýge kómektesti. Daǵdarysqa qaramastan, joǵary atalǵan sharalar kesheni Úkimetke 120 milliard teńge kóleminde divident tóleýge múmkindik berdi. Bul 2017 jylmen salystyrǵanda 10 esege kóp», - dedi Nursultan Nazarbaev.
