Qazaqstanda koronavirýs infektsiiasyn juqtyrǵandardyń táýliktik statistikasy jańa antirekord kórsetti. Virýsty taratpaý jónindegi vedomstvoaralyq komissiia málimeti boiynsha, 27 naýryzda derti PTR testimen rastalǵan 1 596 adam tirkeldi. Bul – aldyńǵy kúnderdegiden áldeqaida kóp.
Ásirese Almaty men astanada jaǵdai kúrdeli. Qazaqstannyń eń iri qalasy – Almatyda bir táýlikte Covid juqtyrǵandar sany psihologiialyq mejeden asyp, 510 adam sanaqqa alyndy, al el astanasy Nur-Sultanda 382 naýqas tirkeldi. Munyń aldynda Almatynyń bas sanitar dárigeri Jandarbek Bekshin aýrýhanaǵa kúnine 500 adamnan artyq tússe, qatań lokdaýn engiziledi dep málimdegen. 15 naýryzdaǵy jaǵdai boiynsha, qaladaǵy koronavirýs naýqastaryna arnalǵan aýrýhanadaǵy oryndardyń 40 paiyzy bos emes.
Aimaqtar kórsetkishine qarasaq, Almaty jáne Batys Qazaqstan oblystarynda koronavirýs juqtyrǵandar kóp. Almaty oblysynda - 110 adam, Batys Qazaqstan oblysynda 98 adam Covid-19-ben tirkeýge alyndy.
Resmi derek boiynsha, ótken táýlikte bul dertten 14 kisi kóz jumǵan.
Densaýlyq saqtaý ministrligi "simtomdary koronavirýsqa uqsas", biraq test nátijesi teris shyqqan naýqastar statistkasyn ádettegidei bir kún keshiktirip jariialady. 26 naýryzda "Covid tektes prevmoniiamen" 94 adam tirkelgen, 3 adam qaitys bolǵan.
Indet kelgeli Qazaqstanda koronavirýspen aýyryp, resmi tirkelgender (KVI+) sany 240 381 adamǵa, al oǵan uqsas pnevmoniiaǵa (KVI-) shaldyqqandar 50 411 adamǵa jetti. Covid pen oǵan uqsas pnevmoniiadan 3 674 adam kóz jumdy.
Ótken táýlikte 906 adam bul dertten jazylyp shyqty.
28 naýryzdaǵy málimet boiynsha, qazir Qazaqstanda 23 310 adam koronavirýs infektsiiasynan (21 007 KVI+ jáne 2 303 KVI-) emdelip jatyr, sonyń ishinde ishinde 7 811 patsient statsionarǵa jatqyzylǵan. 348 naýqastyń jaǵdaiy aýyr, 81-iniń jaǵdaiy óte aýyr, 52 kisi ókpeni jasandy jeldetý apparatyna qosylǵan.
