Qazaqstanda koronavirýstan bir kúnde 152 adam qaitys boldy. Bul týraly 15 tamyz kúni Densaýlyq saqtaý ministrligi habarlady.
32 adam "kovidtektes pnevmoniiadan" (KVI-), 120 adam PTR testimen rastalǵan koronavirýstan kóz jumǵan.
Ekeýin qosa alǵanda, Almatyda 40, Shymkentte 20, Nur-Sultanda 16, Mańǵystaý oblysynda 15 kisi qaitys bolǵan.
Resmi statistika boiynsha, elde indet bastalǵaly 11 602 adam qaitys bolǵan. Biraq bul statistikaǵa koronavirýs juqtyrǵan, biraq "ózge aýrýdan qaitys boldy" degen 2367 adam kirmeidi.
Elde keiingi eki aptada kún saiyn 8 myńǵa jýyq Covid naýqasy tirkelip júr. Mamandar muny álemge tez taraǵan "Delta" variantymen bailanystyrady. Alǵash ret Úndistanda tirkelgen bul variant bastapqy virýsqa qaraǵanda juqpalyraq ári qaýiptirek sanalady. Qazaqstanda bul variant maýsymnyń sońynda tirkelgen.
Indet bastalǵaly elde barlyǵy 687 myńnan astam adamnyń analizinen koronavirýs anyqtalǵan. Bilik budan bólek PTR testi teris shyqqan, biraq aýrý belgileri boiynsha koronavirýsqa uqsaityn "kovidtektes pnevmoniianyń" esebin júrgizip keledi. Bul esep byltyr 1 tamyzda bastalǵan. Sodan beri pnevmoniianyń bul túrimen 65,6 myń adam tirkelgen.
19 million halqy bar Qazaqstanda úkimet 10 million adamǵa vaktsina salýdy kózdeidi. 1 aqpanda bastalǵan bul naýqan osy kúnge deiin 6 million 74 myń adamdy qamtyǵan. Olar vaktsinanyń kemi bir komponentin saldyrǵan. Ekpeni tolyq alǵany – 4,7 million adam.
