13 qyrkúiekte 2 801 adamnyń analizinen koronavirýs anyqtaldy. Bul - aldyńǵy kúnmen salystyrǵanda shamamen 300 adamǵa az.
Densaýlyq saqtaý ministrliginiń málimetinshe, Almatyda 611 adamnan koronavirýs anyqtalǵan. Almaty qalasy koronavirýstyń bir kúndik kórsetkishi boiynsha respýblikada aldyńǵy orynda tur. Dúisenbi kúni Qaraǵandy oblysynda 381 naýqas tirkelgen. Astanada bir kúnde 324 adamnan infektsiia anyqtalǵan.
Indet bastalǵaly beri 845 myń adamnyń PTR testi oń shyqqan. 10 427-y qaitys bolǵan.
Maýsym aiynyń sońynan beri kún saiyn birneshe myń naýqas tirkelip keledi. Shilde men tamyzda kúndik kórsetkish 7 myńnan asqan. Mamandar aýrý ósimin virýstyń qaýipti ári tez juǵatyn túri – delta shtammen bailanystyrǵan.
Jeksenbi, 12 qyrkúiekte Qazaqstanda koronavirýspen bailanysty 83 adam ólimi tirkeldi: 73 adam – koronavirýstan, 10 adam koronavirýs pnevmoniiasynan qaitys boldy dep aitylady.
Qazaqstan 2020 jyldyń 1 tamyzynan bastap PTR testi teris shyqqan, biraq aýrý belgileri boiynsha koronavirýsqa uqsaityn "kovidtektes pnevmoniia" esebin júrgizip keledi. Osy kúnge deiin pnevmoniianyń bul túrine 72,8 myń adam shaldyqqan. Onyń ishinde 4687 adam aýrýdan aiyǵa almai qaitys bolǵan. 12 qyrkúiekte 24 adamǵa koronavirýs pnevmoniiasy diagnozy qoiyldy.
Qazir shamamen 76 myń adam koronavirýstan emdelip jatyr, 15 myńy statsionarda jatyr.
19 million halqy bar Qazaqstanda úkimet 10 million azamatqa koronavirýs vaktsinasyn salýdy kózdep otyr. Búginge keiin deiin ekpeni 6 mln-ǵa jýyq adam tolyq alǵan. Budan bólek, 1,1 mln adam vaktsinanyń ekinshi dozasyn kútip otyr.
Amerikalyq Djons Hopkins ýniversitetiniń málimeti boiynsha, álemde 225 mln adam koronavirýsqa shaldyqqan, 4,6 milliony qaitys bolǵan.
