Shyǵys Qazaqstan oblysy koronavirýstyń taralý qarqyny boiynsha «qyzyl aimaqqa» kirdi. Bul týraly ShQO Taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń mindetin atqarýshy Talǵat Tuńǵyshbaev resmi taratylǵan videoúndeýde, dep habarlaidy "Ult aqparat".
1 qazan men 2 qarasha aralyǵynda oblys boiynsha 1681 reid júrgizilip, 9321 nysan qamtylǵan. Sanitarlyq-epidemiologiialyq talaptardy saqtamaǵandarǵa QR ÁQBtK-niń 425-baby 1-bóligimen 381 aiyppul salyndy.
Oblysta jalpy qýattylyǵy táýligine 7 myń synamamen jumys istei alatyn 10 zerthana bar. Bul júkteme óńir aýmaǵyna artyǵymen jetkilikti. Qazirgi ýaqytta táýligine orta eseppen 3000-ǵa deiin zertteý júrgizilýde. PTR testileriniń tapshylyǵy joq. Búginde oblysta 78 myń test bar. Bul kem degende 3 aiǵa jetkilikti jáne olar únemi tolyqtyrylyp otyrady.
«Ózderińiz biletindei, álemniń kóptegen elderinde qatań lokdaýndar engizilgen. Ispaniiada tótenshe jaǵdai rejimi men komendanttyq saǵat engizildi, shekteýlerdi 2021 jyldyń mamyryna deiin uzartý josparlanýda. Irlandiiada 6 qazannan bastap qaita lokdaýn jariialandy. Úilerinen 5 shaqyrymnan asatyn qashyqtyqta júrýge tyiym salynyp, barlyq kásiporyndardyń jumysy toqtatyldy», - deidi T.Tuńǵyshbaev.
Onyń aitýynsha, Frantsiiada 1 jeltoqsanǵa deiin komendanttyq saǵat engizildi. Germaniiada qaita karantin jariialanyp, qonaq úiler, tamaqtaný oryndary jabyldy.
«Al bizdiń oblysta jumsartylǵan shekteýler bekitildi. Kásiporyndar jabylmai, komendanttyq saǵat engizilmeidi. Óńirdegi barlyq shekteý sharalary adamdardyń densaýlyǵy men ómirin qorǵaýǵa baǵyttalǵan. Biz azamattardyń osy shekteý sharalaryna jaýapkershilikpen qarap, túsinistik tanytaryna senemiz. Ózińizdi jáne jaqyndaryńyzdy qorǵańyz!», - dedi Talǵat Tuńǵyshbaev.
Sońǵy málimetterge sáikes, ShQO-da 10747 adam koronavirýs juqtyrǵan. Onyń ishinde 8508 adam jazylyp shyqsa, kóz jumǵandar sany – 249.
