20 qazannan bastap koronavirýspen kúreste júrgen meditsina qyzmetkerlerine birrettik áleýmettik tólem berý toqtatyldy. Bul týraly QR Densaýlyq saqtaý birinshi vitse-ministri Marat Shoranov aitty, dep habarlaidy QazAqparat.
«COVID-19-ben kúres aiasyndaǵy sharalarǵa jumyldyrylǵan meditsina qyzmetkerleriniń ailyq jalaqylaryna indetti juqtyryp alý táýekeli úshin ústemaqy tóleý jalǵasyp jatyr. Premer-Ministrdiń tapsyrmasymen 20 qazanda Úkimet janyndaǵy vedomstvoaralyq komissiianyń kezekti otyrysy ótip, onda meditsina qyzmetkerlerine birrettik áleýmettik tólemdi aiaqtaý týraly sheshim qabyldandy. Atap aitqanda, 20 qazannan bastap qazirgi ýaqytta jasalǵan barlyq jaǵdaidy eskere otyryp, meditsina qyzmetkerlerine áleýmettik tólem úshin jańa ótinimder qabyldaý toqtatyldy», - dedi ol Ortalyq kommýnikatsiialar qyzmetindegi baspasóz máslihatynda.
Birinshi vitse-ministrdiń aitýynsha, qazirgi ýaqytta tólem alýǵa quqyly meditsina qyzmetkerleriniń 421-ine ǵana aqsha aýdarylǵan joq. Olarǵa qatysty másele óńirlik komissiia deńgeiinde rásimdelip jatyr. Tólem osy jyldyń 23 qazanyna deiin beriledi.
«Jumys barysynda aýyryp qalǵan jaǵdaida aldaǵy ýaqytta qoldaý sharalary meditsinalyq uiymdardyń nemese kásipodaq uiymdarynyń ne jergilikti atqarýshy organdardyń qarajaty esebinen kórsetiletin bolady. Bul meditsina uiymdarynyń basshylaryn óziniń meditsinalyq qyzmetkerlerin jeke qorǵanysh zattarymen qamtamasyz etýge, sanitarlyq-epidemiologiialyq rejimniń saqtalýyna baqylaý jasaýǵa yntalandyratyn bolady», - dedi Marat Shoranov.
