Májilistiń jalpy otyrysynda «Qazaqstan men Aziia Damý Banki arasyndaǵy Qaryz týraly kelisimdi ratifikatsiialaý týraly» zań jobasy maquldandy, dep habarlaidy "Ult aqparat".
QR Qarjy ministri Erulan Jamaýbaevtyń aitýynsha, 2020 jylǵy 13 tamyzdaǵy QR Prezidentiniń № 385 Jarlyǵyna sáikes, 908 mln 596 myń eýro somasyndaǵy Qazaqstan Respýblikasy men Aziia Damý Banki arasyndaǵy Qaryz týraly kelisimge qol qoiyldy.
«Bul QR Úkimetiniń COVID-19 pandemiiasynyń saldarymen kúres jáne ekonomikany qalpyna keltirý jónindegi sharalaryn qoldaýǵa múmkindik beredi. Óteý merzimine qatysty qaryz eki bólikke bólingen. 454 mln 298 myń eýro somasyndaǵy qaryzdyń bir bóligi, iaǵni jartysy 3 jyldyq jeńildik kezeńdi qosa alǵanda, 10 jyl merzimge beriledi. Al qalǵan 454 mln 298 myń eýro somasyndaǵy ekinshi jartysy 3 jyldyq jeńildik kezeńdi qosa alǵanda, 5 jyl merzimge beriledi. Syiaqy mólsherlemesi ‒ Eýribor+0,50%», - dep túsindirdi ministr.
Kelisimde belgilengen qarjylyq sharttarǵa sáikes, qaryzǵa qyzmet kórsetý jáne ony óteý respýblikalyq biýdjet qarajaty esebinen júzege asyrylady.
«Kórsetilgen qarajatty tartý biýdjettiń bekitilgen tapshylyǵy jaǵdaiynda asa qajet bolyp tabylady. Kelisimniń jaqyn arada kúshine enýi mańyzdy. Bul qarajat Aziia Damý Bankiniń pandemiiaǵa qarsy kúres jónindegi arnaiy arnaiy sheshimimen Qazaqstan Respýblikasy úshin 2020 jylǵa rezervtelgen», - dedi E. Jamaýbaev.
