Italiia úkimeti COVID-19 juqtyrýshylar sanynyń artýyna bailanysty el aýmaǵynda ekinshi qatań karantin rejimin engizedi. Ol búgingi kúnnen bastap 2020 jylǵy 3 jeltoqsanǵa deiin qoldanysta bolady, dep habarlaidy ANSA agenttigi.
Karantin aiasynda Italiia qalalarynda jergilikti ýaqyt boiynsha keshki saǵat 22:00-den bastap tańǵy 05:00-ge deiin komendant saǵaty jariialanady.
Mektep avtobýstaryn qospaǵanda qoǵamdyq kólikterdiń syiymdylyǵy 50%-dan kóp bolmaýy kerek. Úkimettiń qaýlysyna sáikes krýizder de toqtatylady.
Elde koronavirýs infektsiiasynyń taralýyn boldyrmaýǵa arnalǵan basqa sharalar qatarynda orta mektepterde qashyqtan oqytý, demalys kúnderi murajailar men saýda ortalyqtaryn jabý da bar.
Budan ári sharalar jergilikti jerlerde kem degende eki aptanyń ishinde aimaqtarmen kelise otyryp qabyldanady, delingen Italiia úkimetiniń qaýlysynda.
Naqty sandarǵa keletin bolsaq, Italiianyń Densaýlyq saqtaý ministrliginiń málimeti boiynsha, sońǵy 24 saǵat ishinde elde COVID-19 juqtyrýdyń 30 550 jańa jaǵdaiy tirkelgen. Koronavirýstan Italiiada taǵy 353 adam kóz jumǵan. Elde COVID-19 virýsynan qaitys bolǵandardyń jalpy sany 39 764 adam.
Italiianyń densaýlyq saqtaý ministrliginiń keńesshisi Jovanni Retstsa COVID-19 infektsiiasy juqtyrý, sondai-aq ólim jaǵdailarynda turaqtylyq bar ekenin, biraq olardyń sany áli de joǵary ekenin atap ótti.
