Foto: Tengrinews.kz
5 qańtardan bastap Covid-19 koronavirýs infektsiiasynyń taralýynyń aldyn alý boiynsha qosymsha sharalar sheńberinde jekelegen obektilerdiń qyzmetine engiziletin jańa shekteýler kúshine enedi, dep habarlaidy QazAqparat agenttigi Covid-19 taralýyna jol bermeý jónindegi VAK baspasóz qyzmetine silteme jasap.
Qazaqstan Respýblikasynyń Bas memlekettik sanitarlyq dárigeriniń qaýlysymen jumys jáne demalys kúnderinde saýda jáne oiyn-saýyq ortalyqtaryna, saýda úilerine, saýda jelilerine (azyq-túlik emes), saýda jelilerine (saýda alańy 6000 sharshy metrden astam), karaokege kirýge jumys rejimi shektelmei, qyzmetkerler men kelýshilerde qaýipsiz «jasyl» mártebe (vaktsinatsiia, synama alynǵan sátten bastap 7 kúnnen aspaityn teris nátijesi bar PTR testi, turaqty meditsinalyq qarsy kórsetilimderi bar, sońǵy 3 ai ishinde aýyryp saýyqqan adamdar) bolǵan jaǵdaida ruqsat etiledi.
Qabyldanǵan sharalar koronavirýstyń «Omikron» túriniń taralý jáne juǵý jyldamdyǵyna negizdelgen, ol qazirdiń ózinde álemniń 110 elinde anyqtaldy, al 30 qarashada ol nebári 10 elde anyqtalǵan bolatyn.
«Omikron» túriniń taralýy birqatar elderdiń densaýlyq saqtaý júiesiniń shamadan tys júktelýin týdyrýda. Osyǵan bailanysty qabyldanyp otyrǵan sharalar epidemiologiialyq jaǵdaidyń turaqtylyǵyn saqtaýǵa, aýrýlar sanynyń ósý qaýpin azaitýǵa, neǵurlym qatań shekteý sharalaryn engizýge jol bermeýge baǵyttalǵan.
Koronavirýstyń bul túriniń juqpalylyǵy «Delta» nusqasyna qaraǵanda 5 ese joǵary ekenin este saqtaý kerek, qaita juqtyrý qaýpi joǵary. Dúniejúzilik densaýlyq saqtaý uiymynyń boljamy boiynsha aýrý birneshe aidyń ishinde búkil álemge taralýy múmkin.
