Búgin UEFA Chempiondar ligasy 1/8 finalynda taǵy eki oiyn ótkiziledi, dep habarlaidy "Ult aqparat".
Jarystyń atalǵan satysyndaǵy bir kezdesýde «Portý» (Portýgaliia) men «Iýventýs» (Italiia) komandalary sheberlik baiqasady.
Oiyn elorda ýaqytymen 01.50-de bastalyp, «Qazsport» telearnasynan tikelei efirde kórsetiledi.
Eki komanda dop dodasynda buǵan deiin eki márte kezdesti. 2017 jyly 1/8 finalda italiandyq klýb qarsylasyn eki oiynda 1:0, 2:0 esebimen jeńip, shirek finalǵa joldama alǵan bolatyn.
Eki komanda quramynda jaraqat alǵan oiynshylar sany kóp emes. Tek «Portý» quramynda Fernando Andrade kezdesýden tys qalyp otyr.
Kezdesýge ispaniialyq Karlos Del Serro Grande qazylyq etse, oǵan otandastary Hýan Iýste Himenes pen Roberto Alonso Fernandes kómekshilik jasaidy.
Oiyn Portý qalasyndaǵy «Dragão» stadionynda ótkiziledi.
Búgingi taǵy bir kezdesýde «Sevilia» (Ispaniia) jáne «Borýssiia Dortmýnd» (Germaniia) jasyl alańǵa shyǵady.
Oiyn elorda ýaqytymen 01.50-de bastalyp, «Qazsport» telearnasynan tikelei efirde kórsetiledi.
Buǵan deiin atalǵan klýbtardyń Chempiondar ligasynda joly túiisken emes.
Al Eýropa ligasynda 2010 jyly toptyq kezeńdegi alǵashqy oiynda «Sevilia» qarsylasyn 1:0 esebimen jeńip, qarymta oiynda 2:2 esebi tirkeldi.
Ispandyq klýb jarysty jalǵastyrdy.
Búgingi kezdesýge niderlandylyq Danni Makkeli bas tóreshi retinde belgilengen.
Oǵan otandastary Hessel Stegstra men Mario Diks kómekshilik etedi. Oiyn Sevilia qalasyndaǵy «Ramón Sánchez Pizjuán» stadionynda ótedi.
Oiynǵa qatysa almaityn fýtbolshylar bar. Alǵan jaraqatyna bailanysty «Sevilia» quramynan Hesýs Navas, Lýkas Okampos, Markos Akýnia, «Borýssiia Dortmýnd» qatarynan Torgan Azar, Dan-Aksel Zagadý, Aksel Vitsel, Marsel Shmeltser, Roman Biýrki, Toma Mione, Lýkash Pishek jasyl alańǵa shyqpaidy.
Qarymta oiyndar 11 naýryzǵa belgilengen.
