Ómir boiyna sottalǵan Vladislav Chelah tiri, deni saý, abaqtyda jazasyn ótep jatyr. Bul týraly ishki ister ministrligi qylmystyq-atqarý júiesi komitetiniń baspasóz qyzmeti habarlady, dep jazady Sputnik Kazakhstan agenttigi.
Buǵan deiin "Qara búrkit" koloniiasynda jazasyn ótep jatqan Vladislav Chelahtyń qaza bolǵany týraly qaýeset taraǵan edi.
"Aqparat shyndyqqa janaspaidy. Sottalǵan azamat - tiri, deni saý. Qaýipsizdigi barynsha joǵary mekemede jazasyn ótep jatyr. Densaýlyǵyna shaǵymy joq" - dep málimdedi qylmystyq-atqarý júiesi komitetinen.
Arqankergendegi qandy qyrǵyn
2012 jyldyń 28 mamyrynda qazaq-qytai shekarasynda ornalasqan "Arqankergen" shekara beketinde qaiǵyly oqiǵa boldy.
Mamyr aiynyń sońǵy kúnderinde Arqankergendegi shekarashylarmen bailanys kenetten úziledi. Eki kúnnen keiin – 30 mamyrda Arqankergenge jiberilgen jasaq shekara beketiniń túgi qalmai janyp ketkenin kóredi.
Bir kúnnen keiin Ulttyq qaýipsizdik komitetine qarasty shekara qyzmeti órtenip ketken ǵimarattan 12 adamnyń súiegi, al kelesi kúni taǵy eki shekarashynyń múrdesi tabylǵanyn málimdedi. Buǵan qosa, bir qoryqshynyń máiiti tabylǵan.
4 maýsymda shekara beketinen 24 shaqyrymda ornalasqan qystaýlardyń birinde 15-shi shekarashy Vladislav Chelah ustaldy. Ol kezde qaraǵandylyq jigit 19 jasta bolǵan. Áýeli belgisiz bireýler shekarashylarǵa shabýyl jasady dep habarlanǵan edi, keiin tergeý Chelah bárin jairatyp salyp, osydan keiin máiitterdi órtep jiberdi degen qorytyndyǵa keldi.
Eń alǵash ustalǵan kezde Chelah ta qylmysyn moiyndaidy. Biraq keiin sotta barlyǵyn joqqa shyǵardy. Ol oǵan qysym jasalǵanyn, kináni moiyndaýǵa májbúr bolǵanyn, eshkimdi óltirmegenin, tek órt qoiǵanyn málimdedi.
Bul is boiynsha sot úkimi 2012 jyly 11 jeltoqsanda shyqty. Sot Chelahty 15 adamdy óltirdi dep tanyp, ómir boiyna bas bostandyǵynan aiyrdy.
