Chehiia áskeri qarý-jaraq qoimasyndaǵy 2014 jylǵy jarylysqa Resei barlaý qyzmetiniń qatysy bolýy múmkin dep, Resei elshiliginiń 18 qyzmetkerin eline qaitarý týraly sheshim qabyldady. Bul týraly 17 sáýirde Chehiia úkimetiniń basshysy Andjei Babish pen syrtqy ister ministri Ian Gamachek málimdedi.
Babishtiń sózinshe, Chehiianyń quqyq qorǵaý organdary Vrbetits aýylyndaǵy aýqymdy jarylysqa Resei áskerileriniń qatysy baryn dáleldegen.
"Chehiia Respýblikasy – egemen memleket jáne ol mundai derekter áshkere bolǵanda jaýap berýi tiis" dedi eldiń premer-ministri.
"Nemis tolqyny" radiosynyń habarlaýynsha, Chehiianyń syrtqy jáne ishki ister ministri qyzmetin qatar atqaryp otyrǵan Ian Gamachek Resei elshiliginde isteitin 18 diplomattyń shyn máninde Resei bas barlaý basqarmasy (GRÝ) men syrtqy barlaý qyzmetiniń adamdary ekenin dáleldeitin aiǵaqtyń baryn aitqan. Diplomattarǵa elden ketýge 48 saǵat berilip otyr.
Osynyń aldynda ǵana Ian Gamachektiń Máskeý saparynan bas tartqany belgili boldy. Bul saparda ol "Spýtnik V" vaktsinasyn satyp alý jóninde kelissóz júrgizbek bolǵan. Bul jospary úshin Gamachekti óz koalitsiiasyndaǵy áriptesteri de, oppozitsiia da synaǵan.
Praganyń 18 diplomatty qaitarýy Chehiianyń Reseimen qarym-qatynasyna nuqsan keltiredi dedi Resei memlekettik dýmasy halyqaralyq ister jónindegi komitetiniń tóraǵasy Leonid Slýtskii.
"Diplomatiialyq missiianyń 18 qyzmetkerin qaitarý – Reseimen ekijaqty qarym-qatynasyna aýyr soqqy" dedi Slýtskii jýrnalisterge senbi, 17 sáýir kúni. "Negizdemesi de, 2014 jylǵy oqiǵaǵa silteýi de syn kótermeidi. Mundai qadamǵa barýǵa shynaiy sebeptiń joǵyna senimdimin".
Slýtskii Reseidiń Praganyń qadamyna qarymta qaitaratynyn málimdedi.
Osy arada Chehiia politsiiasy ártúrli pasporty bar degen eki Resei azamatyna izdeý saldy. Bul eki azamat Chehiiada 2014 jyly 11-16 qazan aralyǵynda bolǵan. Politsiianyń sózine qaraǵanda, áńgime Aleksandr Petrov pen Rýslan Boshirov deitin atyshýly reseilikter jóninde bolyp otyr.
Ulybritaniia Petrov pen Boshirovti Sergei men Iýliia Skripaldardy "Novichokpen" ýlaýǵa qatysy bar GRÝ qyzmetkerleri sanaidy. Bellingcat pen The Insider málimetinshe, Petrov pen Boshirovtyń naǵyz aty-jóni Anatolii Chepiga jáne Aleksandr Mishkin.
