Abaidyń 175 jyldyǵy qarsańynda Qazaqstannyń Chehiiadaǵy Elshiligi Qazaqstannyń Ulttyq akademiialyq kitaphanasymen birlesip cheh tiline aýdarylǵan «Qara sózder» kitabynyń onlain tanystyrylymyn ótkizdi, dep habarlaidy "Ult aqparat".
Is-sharaǵa belgili qoǵam qairatkerleri, ǵalymdar, Qazaqstan men Chehiianyń ǵylymi toptary men buqaralyq aqparat quraldarynyń ókilderi qatysty.
Qazaqstandyq diplomattar Qazaqstan Táýelsizdiginiń 30 jyldyǵy qarsańynda uly aqynnyń sózderi erekshe mánge ie bolatynyn atap ótti.
Cheh «Aziia dostary klýbynyń» jetekshisi, professor, filosofiia ǵylymdarynyń doktory Irji Shima kitaptyń jaryq kórýi cheh jurtshylyǵyna álemdik ádebiettiń damýy men qalyptasýyna ólsheýsiz úles qosqan qazaqtyń uly aqynynyń shyǵarmashylyǵymen tanysýǵa múmkindik beretinine senim bildirdi.
Karlov ýniversitetiniń professory Tomas Kýchera: «Qazaqtyń oishyly jáne aqyny Abaidyń kitaby teńdesi joq basylym. Bul cheh oqyrmandaryna qazaq halqynyń tarihyn tereńirek túsinýge múmkindik beredi jáne bul bizdiń mádenietterimizdi jaqyndastyratyny sózsiz», dedi.
Cheh buqaralyq aqparat quraldary ókilderiniń sózderi de qyzyǵýshylyqpen tyńdaldy.
Qazaqstandyq taraptan prezentatsiiaǵa qatysqandar: QR Ulttyq akademiialyq kitaphanasynyń bas direktorynyń orynbasary Áliia Qojabekova, «Qazaqstan Jazýshylar odaǵynyń» tóraǵasy, aqyn Ulyqbek Esdáýlet, M.Áýezov atyndaǵy ádebiet jáne óner institýtynyń direktory Kenjehan Mamytjanov.
Cheh tiline aýdarylǵan «Abaidyń qara sózderin» Qazaqstan Respýblikasynyń Elshiligi Pragadaǵy bilim berý mekemeleriniń kitaphana qoryna jiberedi.
