Qapshaǵai qalasynyń soty Qazaqstan Jýrnalister odaǵynyń burynǵy tóraǵasy, "qarjy jymqyrdy jáne salyqtan jaltardy" degen aiyppen sottalǵan Seiitqazy Mataevty qamaýdan bosatty. Mataev endi jazasyn shartty túrde óteidi, dep habarlaidy "Ult aqparat" Azattyqqa silteme jasap.
Sot sheshimi on bes kúnnen keiin oryndalady. Osy aralyqta prokýrordyń appelatsiialyq shaǵym túsirýge quqyǵy bar. Mataev sotqa video bailanys arqyly qatysty.
Otyrysta prokýror Seiitqazy Mataev sot úkimi boiynsha memleketke keltirgen 200 million teńge zalaldy ótemegenin aityp, ony bosatýǵa qarsy boldy. Al sotta video bailanys arqyly jaýap bergen koloniia dárigerleri Mataevtyń qan qysymy kóterilip ketetinin (gipertoniialyq kriz diagnozy), túrmeniń sanitarlyq bóliminde tiisti em-dom ala almaitynyn aityp, ony shartty túrde merziminen buryn bosatýdy qoldady.
LA 155/4 koloniiasynyń ókili Seiitqazy Mataevtyń túrmedegi tártibi "jaqsy bolǵanyn", "úlgili minez-qulqy úshin yntalandyrýǵa ie bolǵanyn", sottalýshyny merziminen buryn bosatýdy qoldaitynyn aitty.
2016 jyly 3 qazanda Astananyń Esil aýdandyq soty Mataevty "qarjy jymqyrdy" jáne salyqtan jaltardy" (QR QK-niń 190-baby, 4-bólimi, 2-tarmaǵy jáne 245-baby, 3-bólimi boiynsha, sondai-aq QR QK-niń (16.07.1997 jylǵy redaktsiia) 177-babynyń 4-bóliminiń "b" tarmaǵy boiynsha) degen aiyptarmen alty jylǵa, al QazTAG agenttiginiń direktory Áset Mataev "qarjy jymqyrdy" (QR QK-niń 190-babynyń 4-bóliminiń 2-tarmaǵy boiynsha) degen aiyppen bes jylǵa sottaǵan. Úkim boiynsha Mataevtar aqparat jáne kommýnikatsiia ministrligine - 169 million teńge, "Qazaqtelekom" kompaniiasyna 140 million teńge qaitarýy tiis bolǵan. Mataevtar ózderine taǵylǵan aiypty moiyndamaidy. Jergilikti jáne halyqaralyq quqyq qorǵaý uiymdary Mataevtyń sottalýyn aiyptaǵan bolatyn.
Aita keteiik, Mataevtyń uly - Áset Mataevqa qatysty is 2018 jyldyń aqpanynda qaralatyn bolady.
