Almaty politsiiasy «Car city» avtobólshekter bazarynda 94 adamdy ustap, bólimshege jetkizdi, dep habarlaidy QazAqparat tilshisi.
Bul týraly qalalyq IID resmi ókili Saltanat Ázirbek aitty.
Reid áli de jalǵasyp jatyr. Osy ýaqytqa deiin avtobólshek saýdasymen ainalysatyn 1 133 dúńgirshek, 37 TQKO, 94 kólik tekserildi.
Politsiianyń nazaryna túsken 936 adamnyń 94-i bólimshege jetkizildi.
«Olardyń 17-si Ózbekstan azamaty bolyp shyqty. Olar QR Kóshi-qon týraly zańnamasyn buzǵan. Reid barysynda izdeýdegi 5 qylmysker ustaldy. Avtobólshek saýdasymen ainalysatyn 5 satýshy kúmán týǵyzdy. Olar buryn paidalanylǵan aina, áinek, aina korpýsy, tumanǵa qarsy fara, avtomagnitola satatyny anyqtaldy. Olar resmi distribiýtor bolsa, satqan taýarlaryna resmi qujat bolýy tiis. Mundai qujattar olarda joq bolyp shyqty», - dedi Saltanat Ázirbek.
Sondai-aq, tekserilgen kásipkerlerdiń úsheýi salyq organdarynda tirkelmegen bolyp shyqty.
Bazar mańynda saýdamen ainalysyp júrgen 3 kámelettik jasqa tolmaǵan jetkinshek Almatydaǵy balalardy beiimdeý ortalyǵyna tapsyryldy.
«Endi olardyń ata-anasyna QR ÁQK 127-baby boiynsha ákimshilik jaza qoldanylady. Al balalardy jumysqa salǵany úshin jumys berýshi QR ÁQK 86-baby boiynsha jaýap beretin bolady», - dedi S.Ázirbek.
Aita ketý kerek, kesheli beri Almatyda avtobólshek bazarynda arnaiy reid júrgizilip jatyr.
Keshe «Jibek joly» avtobólshek bazaryn tekserýdi bastaǵan edi. Jedel profilaktikalyq shara 29 shildege deiin jalǵaspaq.
