الماتى پوليتسيياسى «Car city» اۆتوبٶلشەكتەر بازارىندا 94 ادامدى ۇستاپ, بٶلٸمشەگە جەتكٸزدٸ, دەپ حابارلايدى قازاقپارات تٸلشٸسٸ.
بۇل تۋرالى قالالىق ٸٸد رەسمي ٶكٸلٸ سالتانات ەزٸربەك ايتتى.
رەيد ەلٸ دە جالعاسىپ جاتىر. وسى ۋاقىتقا دەيٸن اۆتوبٶلشەك ساۋداسىمەن اينالىساتىن 1 133 دٷڭگٸرشەك, 37 تقكو, 94 كٶلٸك تەكسەرٸلدٸ.
پوليتسييانىڭ نازارىنا تٷسكەن 936 ادامنىڭ 94-ٸ بٶلٸمشەگە جەتكٸزٸلدٸ.
«ولاردىڭ 17-سٸ ٶزبەكستان ازاماتى بولىپ شىقتى. ولار قر كٶشٸ-قون تۋرالى زاڭناماسىن بۇزعان. رەيد بارىسىندا ٸزدەۋدەگٸ 5 قىلمىسكەر ۇستالدى. اۆتوبٶلشەك ساۋداسىمەن اينالىساتىن 5 ساتۋشى كٷمەن تۋعىزدى. ولار بۇرىن پايدالانىلعان اينا, ەينەك, اينا كورپۋسى, تۇمانعا قارسى فارا, اۆتوماگنيتولا ساتاتىنى انىقتالدى. ولار رەسمي ديستريبيۋتور بولسا, ساتقان تاۋارلارىنا رەسمي قۇجات بولۋى تيٸس. مۇنداي قۇجاتتار ولاردا جوق بولىپ شىقتى», - دەدٸ سالتانات ەزٸربەك.
سونداي-اق, تەكسەرٸلگەن كەسٸپكەرلەردٸڭ ٷشەۋٸ سالىق ورگاندارىندا تٸركەلمەگەن بولىپ شىقتى.
بازار ماڭىندا ساۋدامەن اينالىسىپ جٷرگەن 3 كەمەلەتتٸك جاسقا تولماعان جەتكٸنشەك الماتىداعى بالالاردى بەيٸمدەۋ ورتالىعىنا تاپسىرىلدى.
«ەندٸ ولاردىڭ اتا-اناسىنا قر ەقك 127-بابى بويىنشا ەكٸمشٸلٸك جازا قولدانىلادى. ال بالالاردى جۇمىسقا سالعانى ٷشٸن جۇمىس بەرۋشٸ قر ەقك 86-بابى بويىنشا جاۋاپ بەرەتٸن بولادى», - دەدٸ س.ەزٸربەك.
ايتا كەتۋ كەرەك, كەشەلٸ بەرٸ الماتىدا اۆتوبٶلشەك بازارىندا ارنايى رەيد جٷرگٸزٸلٸپ جاتىر.
كەشە «جٸبەك جولى» اۆتوبٶلشەك بازارىن تەكسەرۋدٸ باستاعان ەدٸ. جەدەل پروفيلاكتيكالىق شارا 29 شٸلدەگە دەيٸن جالعاسپاق.
