Qazaqstannyń depozitterge kepildik berý qory «Capital Bank Kazakhstan» AQ salymshylaryna kepildik berilgen ótemdi 3 shildesinen bastap tólei bastaidy, dep habarlaidy "Ult aqparat".
Agent bank retinde «Eýraziialyq bank» AQ tańdap alyndy.
«Capital Bank Kazakhstan» AQ depozitterinde, aǵymdaǵy shottarynda jáne tólem kartochkalarynda aqshalary bar jeke tulǵalar men dara kásipkerler kepildik berilgen ótemdi alýǵa quqyly. Kepildik berilgen ótemdi tóleýge ótinishter qabyldaý jáne ótem tóleý operatsiialary agent banktiń bólimshelerinde júrgiziledi.
«Capital Bank Kazakhstan» AQ filialdarynyń tek Nur-Sultan men Almaty qalalarynda ornalasqandyǵyna qaramastan, salymshylarǵa yńǵaily bolýy úshin agent bank ótinishterdi Qazaqstannyń basqa da eldimekenderinde qabyldaityn bolady. Agent banktiń filialdary men bólimsheleriniń mekenjailary jáne jumys isteý tártibi týraly aqparat Eýraziialyq banktiń www.eubank.kz resmi saitynda.
2021 jyldyń 1 shildesindegi jaǵdai boiynsha epidemiialogiialyq ahýalǵa sáikes Nur-Sultan men Almaty qalalary «qyzyl» aimaqqa engizildi. Sondyqtan agent banktiń osy qalalardaǵy bólimsheleri aldaǵy demalys (mereke) kúnderi jumys istemeýi múmkin. Bul rette salymshylar ótem alý úshin basqa kez kelgen kúnderi ótinish bere alady.
QDKBQ salymshylarǵa agent banktiń bólimshelerine barýdan aldyn, onyń saity arqyly bólimshelerdiń jumys isteý tártibi jáne qanshalyqty jumysbasty ekendigin aldyn ala bilip alýǵa keńes beredi.
Ótemdi alý úshin salymshy ótinish toltyryp, jeke basyn kýálandyratyn qujatyn kórsetýi qajet. Eger salymshynyń ornyna basqa tulǵa ótinish beretin bolsa, onda quqyq belgileýshi qujattar usynylady. Mysaly, notariýs kýálandyrǵan muragerlik quqyǵy týraly kýálik nemese senimhat. Kepildik berilgen ótem salymshyǵa onyń qujattary agent bankke kelip túsken kúnnen bastap 5 jumys kúni ishinde tólenedi.
Salymshylar kepildik berilgen ótemdi ózderine yńǵaily tásilmen: agent banktiń kassasynan qolma-qol aqshamen, sol agent bankte bank shotyn (kartochka) ashý nemese kez kelgen basqa bankke aýdarý arqyly alýǵa quqyly. Bul rette agent bank tólem alýǵa ótinishti bólimshege kelmei-aq, www.eubank.kz saitynda onlain túrinde berýge keńes beredi. Kepildik berilgen ótemdi tóleý jónindegi ótinish blankisin tikelei agent bankten alýǵa nemese QDKBQ saitynan (www.kdif.kz) elektrondy nusqasyn júktep alyp, aldyn ala toltyrýǵa bolady.
Eske salamyz, kepildik berilgen ótem bank litsenziiasynan aiyrylǵan kúnge qarai eseptelgen syiaqyny eskere otyryp, «Capital Bank Kazakhstan» AQ salymshylarynyń depozitterindegi qaldyq soma sheginde tólenedi. Bul rette kepildik soma: teńgedegi jinaq depozitter boiynsha – 15 mln teńgeden; teńgedegi basqa depozitter boiynsha – 10 mln teńgeden; shetel valiýtasyndaǵy depozitter boiynsha – valiýta balamasynda 5 mln teńgeden aspaidy (bank litsenziiasynan aiyrylǵan kúni – 2021 jylǵy 25 maýsymda belgilengen valiýta aiyrbastaý baǵamy boiynsha).
«Capital Bank Kazakhstan» AQ salymshysynyń bankte túri men valiýtasy boiynsha eki jáne odan da kóp kepildendirilgen depozitteri bar bolsa, Qor olar boiynsha 15 mln teńgeden aspaityn kólemde kepildik berilgen jiyntyq ótem tóleidi. Bul rette árbir salym túri boiynsha belgilengen limitter eskeriledi. Mysaly, shetel valiýtasyndaǵy depozitter boiynsha shekti soma joǵaryda kórsetilgenindei valiýta balamasynda 5 mln teńgeden aspaidy.
Eger salymshy tólem bastalǵan kúnnen bastap bir jyl ishinde (2021 jyldyń 3 shildesinen bastap 2022 jyldyń 3 shildesine deiin) ótem alýǵa ótinish bermese, onda talap etpegen aqshasy onyń Biryńǵai jinaqtaýshy zeinetaqy qorynda (BJZQ) ashylǵan, erikti zeinetaqy jarnalaryn esepke alýǵa arnalǵan jeke zeinetaqy shotyna aýdarylady.
Depozitterinde Qor tarapynan saqtalýyna kepildik berilgen somadan artyq qalǵan aqshalaryn alý úshin salymshylar, bankti májbúrlep taratý týraly sot sheshimi zańdy kúshine engen soń, «Capital Bank Kazakhstan» AQ taratý komissiiasyna ótinish berýge quqyly.
Buǵan deiin, «Capital Bank Kazakhstan» bank litsenziiasynan aiyrylǵany týraly jazǵan bolatynbyz.
Litsenziiadan aiyrý kúngi jaǵdai boiynsha Bank aktivteriniń mólsheri 38,5 mlrd teńgeni, nesie portfeli – 33,9 mlrd teńgeni qurady, onyń ishinde 30,4 mlrd teńge nemese Banktiń nesie portfeliniń 89,8%-y – 90 kúnnen astam merzimi ótken jumys istemeitin kreditter.
