«Samuryq-Qazyna» ulttyq ál-aýqat qory men Densaýlyq saqtaý ministrligi arasynda koronavirýstyń órshýine qarsy kúresti kúsheitýge yqpal etetin memorandýmǵa qol qoiyldy. Memorandým sheńberinde Qor ministrlikke 100 jedel járdem kóligin, 1000 ottegi kontsentratyn, ókpeni jasandy jeldetetin 50 apparat, 1000 pýlsoksimetr jáne virýsqa qarsy 3000 «Avifavir» dárisin tapsyrdy dep habarlaidy "Ult portaly".
Qol qoiý rásimine «Samuryq-Qazyna» qorynyń basqarma tóraǵasy Ahmetjan Esimov pen Densaýlyq saqtaý ministri Aleksei Tsoi qatysty. Qor usynǵan tehnikanyń, qural-jabdyqtar men dáriniń barlyǵy sala ministrligimen kelise tańdalypty.
«Bul sharalardyń barlyǵyn el Prezidenti Toqaev Qasym-Jomart Kemeluly qoldady. Ózderińiz biletindei, jaqynda Elbasymen kezdesý ótip, onda ol Qordyń ishki qorynan Nur-Sultan men Almaty qalalarynda eki meditsinalyq ortalyq salýǵa qarajat bólýdi tapsyrdy. Bul ortalyqtar halyqqa meditsinalyq qyzmet kórsetý úshin ǵana emes, sonymen qatar ǵylymi-zertteý áleýetin shoǵyrlandyrýǵa arnalady. Biz jumysty bastadyq, qarajatty rezervke saldyq», – dedi Ahmetjan Esimov.
Qor basshysy óz sózinde ministrlikten meditsina ortalyqtary boiynsha tehnikalyq tapsyrma alýdy tezdetýdi, al atalǵan qalalar ákimderinen tiisti kommýnikatsiialary bar jer telimin bólýdi surady.
«Densaýlyq saqtaý ministrligi atynan Qordyń kórsetken korporativtik áleýmettik jaýapkershiligine jáne juqpaly aýrýlardyń, onyń ishinde koronavirýstyń órshýine qarsy kúreste ulttyq densaýlyq saqtaý júiesin nyǵaitýǵa yqpal etkenine alǵys bildiremin. Memorandým qazirgi epidemiologiialyq qaýip-qaterlerge der kezinde jáne qajetti sharalar qabyldaýǵa múmkindik beretinine senimdimin», – dedi Aleksei Tsoi.
«Avifavir» – klinikalyq synaqtarda tiimdiligin rastaǵan álemdegi koronavirýsqa qarsy eki dáriniń biri. Bul dárini «Samuryq-Qazyna» qory «Resei tikelei investitsiialar qorynyń Basqarýshy kompaniiasy» AQ-nan satyp aldy. Qor basshysy onlain-konferentsiia barysynda dárini jasaýshy kompaniia men onyń basshysy Kirill Dmitrievke osy preparattardy satyp alý múmkindigi úshin alǵys aitty.
Aita keteiik, «Samuryq-Qazyna» qory tótenshe jaǵdaidyń alǵashqy kúninen bastap koronavirýspen kúreske belsendi qatysyp keledi. Elbasy tapsyrmasyn oryndaý úshin qor Nur-Sultan men Almaty qalalarynda infektsiialyq aýrýlardyń aldyn alý jáne baqylaý boiynsha eki klinika qurylysyn qarjylandyrady. Biylǵy naýryzda qor 6 mln qorǵaý maskasyn satyp alýdy qarjylandyrdy, sondai-aq ekonomikanyń ósýin nyǵaitý, otandyq taýar óndirýshilerdi qoldaý jáne densaýlyq saqtaý salasyn damytý boiynsha keshendi sharalar qabyldady.
