Parijdik mekteptiń 13 jastaǵy oqýshysy ótirik aitqanyn, saldarynan tarih pániniń muǵalimi Samýel Patidiń basy kesilgenin moiyndady, - dep habarlaidy Fox News.
VVS málimetinshe, qyz ákesine oidan shyǵarylǵan oqiǵany aityp bergen, 47 jastaǵy muǵalim Muhammed paiǵambardyń karikatýrasyn kórsetýge qarsy oqýshylardan synyptan ketýin suraǵan, al qyz oǵan qarsy shyqqan eken. Budan keiin ol eki kúnge sabaqtan shettetilgenin de aitqan. Muny estigennen keiin qyzdyń ákesi muǵalimniń ústinen shaǵym túsirgen bolatyn.
On kúnnen keiin 18 jastaǵy Abdýllah Anzorov muǵalimdi baýyzdap ketken. Keiin Anzorovty politsiia atyp tastaǵan bolatyn.
Al qazirgi ýaqytta "muǵalim oqýshylardan synyptan shyǵyp ketýin suraǵan" kúni ony aiyptaǵan qyz mektepte bolmaǵany anyqtalyp otyr.
Frantsiialyq Le Parisien gazetiniń málimetinshe, ol mektepke barmai júrgeni úshin sabaqtan shettetilgen, sondyqtan muny ákesine aitqysy kelmegen.
Dúisenbide oqýshynyń advokaty qyz synypta bolmaǵanyn, sebebi aýyryp qalǵanyn aitqan.
"Ol ótirik aitty, óitkeni synyptastary odan bul jaǵdaida resmi kýáger bolýdy surady, ol ózin qaqpanǵa túskendei sezindi", - dedi onyń advokaty Mbeko Tabýla France-Presse agenttigine bergen suhbatynda.
Independent habaryna qaraǵanda, quqyqqorǵaýshynyń sózinshe, qyzdyń ákesi "shamadan tys áreket jasaǵany" úshin kináli.
