BJZQ aktivteriniń bir bóligin basqarýdy sheteldik kompaniialarǵa berý mehanizmin júzege asyrý bastaldy. Bul týraly BJZQ tóraǵasynyń qatysýymen ótken baspasóz máslihatynda belgili boldy, dep habarlaidy QazAqparat tilshisi.
«BJZQ» basqarma tóraǵasynyń orynbasary Saýle Egeýbaevanyń aitýynsha, damýshy naryqtardyń jahandyq obligatsiialarynyń mandaty boiynsha Aviva kompaniiasynyń basqarýyna 220 mln. AQSh dollary berildi.
«Bul aqsha esebindegi zeinetaqy qorynyń aktivteri. Aǵymdaǵy jyldyń 1 sáýirine qarai 29 damýshy eldiń BB-reitinginen tómen emes 250 qundy qaǵaz emitentteri belgilengen mandat boiynsha anyqtalǵan. Joǵaryda atalǵan kompaniia búginde baqylaýynda 450 mlrd AQSh dollary bar halyqaralyq deńgeidegi alyp uiymdardyń qataryna kiredi», - deidi Saýle Egeýbaeva.
BJZQ basshylyǵynyń aitýynsha, qor aktivteri qarjyny basqarýdyń naqty baǵyttary men barlyq ortaq sharttardyń oryndalý negizinde basqarýǵa beriledi. Ótken jyly, dál osy basqarý mehanizmi aiasynda aktivterdiń bir bóligin qazaqstandyq kompaniialarǵa berý máselesi qaralǵan bolatyn.
«Bul másele jyl boiy talqylanyp, búginge deiin naqty sheshimin tapqan joq. Premer-Ministr tapsyrmasyna orai, bul másele jyl sońyna deiin sheshilýi tiis. Basqarýǵa tek aqsha emes, qundy qaǵazdar da beriletini naqtylanǵannan keiin biz de daiyn bolýymyz kerek. Dese de, sheteldik kompaniialar qazaqstandyq emitentteri bar qundy qaǵazdar portfeline qyzyǵýshylyǵy tómen bolǵandyqtan, olarǵa aqsha esebinde beriledi», - dedi «BJZQ» AQ basqarma tóraǵasy Nurbúbi Naýryzbaeva.
