Qazaqstandyqtardyń 71 milliard teńge kólemindegi zeinetaqy jinaǵy salymshylardyń esepshotyna 2032 jyly biraq túsedi. BJZQ basshylyǵy Ázirbaijannyń Halyqaralyq bankine aýdarylǵan qarajattyń qalai qaitarylatynyn aityp berdi. Alaida áli de qurdymǵa ketip jatqan kompaniialardyń qundy qaǵazdaryna investitsiialanǵan 40 milliard teńge kelmeske ketýi múmkin degen qater saqtalyp otyr, - dep habarlaidy KTK.
Telearnsha málimetinshe, BJZQ jetekshisi Nurbúbi Naýryzbaeva qor jumysynyń qorytyndysy jaily jaǵymdy sipatta baiandaǵan. Birinshi jartyjyldyqtaǵy tabys shamamen 206 milliardqa jetken.
"5 emitent bankrot bolǵan. Endi olardan árine eshteńe túspeidi. Olardyń jalpy bereshegi 15 milliard teńgedei. Bankrot bolǵan kompaniialardy ózińiz bilesiz, olar zań boiynsha jańaǵy kompaniianyń ózinde bar aktivteri sol jetkeninshe tólenedi. Qazir áli bul kompaniialar aiaǵyna deiin jabylǵan joq. Bankrottyq protsedýra júrip jatyr", - dedi "Biryńǵai jinaqtaýshy zeinetaqy qory" AQ basqarma tóraiymy Nurbúbi Naýryzbaeva.
Al qalǵan kompaniialardaǵy milliardtardy sot arqyly qaitaryp almaq. Bul problemalyq aktivter jeke zeinetaqy qorlarynan mura retinde qalǵan. Taqyrǵa otyrǵan Ázirbaijan bankindegi 71 milliard ta ázir qaitpaidy. Bul eldiń biligi bereshekti moinyna alǵanymen, ony óteý merzimi 2032 jylǵa deiin sozylmaq. Al qaryzdyń qurylymyn qaita qaraý qyrkúiekte aiaqtalady. Biyl zeinetaqy qory óz ishindegi shyǵyndardy da edáýir qysqartypty.
"Qordyń 2017 jylǵy shyǵyndary 12 milliard teńgege qysqartyldy. Bul 28 jarym paiyz. Mysaly eńbekaqy tóleý shyǵyndary qysqartyldy. Olar 23 paiyzǵa qysqartyldy. Milliard, 400 million teńgege. Jáne de, myna issaparǵa bailanysty shyǵyndar qysqartylyp otyr 36 paiyzǵa", - dedi Nurbúbi Naýryzbaeva (KTK).
Eske salaiyq, Qazaqstan úsh jyl buryn taqyrǵa otyrǵan Ázirbaijan Halyqaralyq bakiniń qundy qaǵazdaryna 250 million dollar salǵan bolatyn. Al budan keiin Ázirbaijannyń advokattar alqasynyń múshesi Akram Gasanov Ázirbaijannyń bul qarajatty Qazaqstanǵa qaitaratynyn aitqan edi.
