QR Premer-Ministri Asqar Maminniń tóraǵalyǵymen ótken Úkimet otyrysynda «Biznestiń jol kartasy – 2020» memlekettik baǵdarlamasyn iske asyrý qorytyndylary jáne «Biznestiń jol kartasy – 2025» baǵdarlamasyna usynylatyn sharalar qaraldy.
QR ulttyq ekonomika ministri R. Dálenovtyń aitýynsha, Jol kartasynyń ekinshi besjyldyǵyn iske asyrý jyldary naqty nátijelerge qol jetkizildi. Osy jyly qabyldanǵan sharalardyń negizinde Qazaqstan Dúniejúzilik Banktiń «Doing Business» reitingisinde 25-orynǵa ie boldy. Bul reiting boiynsha elimiz 2015 jylmen salystyrǵanda 16 pozitsiiaǵa kóterildi. Jalpy ishki ónimdegi shaǵyn jáne orta biznestiń úlesi 28,4%-ke deiin artty.
«2015 jylmen salystyrǵanda shaǵyn jáne orta biznes sýbektileriniń sany 400 myńǵa ulǵaiyp, 1,3 mln qurady. Sondai-aq, ShOB jumyspen qamtylǵandardyń sany 300 myńǵa ósip, 3,3 mln adamdy qurady», — dedi QR ulttyq ekonomika ministri.
R. Dálenovtyń aitýynsha, Baǵdarlama aiasynda kásipkerlerge tiisti qoldaý sharalary kórsetiledi. Olardyń qatarynda paiyzdyq mólsherlemeni sýbsidiialaý, nesielerge kepildik berý, memlekettik granttar usyný, kásipkerlerdi oqytý, infraqurylym júrgizý bar.
Baǵdarlamany iske asyrý úshin biýdjetten 282 mlrd teńge bólindi.
«Sonyń nátijesinde 16 myńnan astam shaǵyn jáne orta biznes sýbektileri qarjylandyryldy, 100 myńnan astam kásipker oqytyldy, 15,5 trln teńgege ónim óndirildi, 1 trln teńge shamasynda salyq tólendi», — dedi R. Dálenov.
Buǵan qosa, Baǵdarlama biznesti damytýǵa múmkindik beredi. Baǵdarlama qatysýshylary 7,1%-ben nesie ala alady. Nesieniń maksimaldy qoljetimdi somasy — 2,5 mlrd teńge. 60 mln teńgege deiin kepildik beriledi, sonymen qatar 3 mln teńgege deiin óteýsiz grant usynylady.
Azamattardy biznes negizderine oqytý sharalary qarastyrylǵan. Baǵdarlama sheńberinde konsýltatsiialar alýǵa bolady. Budan ózge, oqytý men taǵylymdamadan ótý qarastyrylǵan.
«Baǵdarlamanyń osy ekinshi besjyldyǵyn iske asyrý jyldarynda 120 myńǵa jýyq kásipker memlekettik qoldaý aldy. 9 myńnan astam kásipkerdiń nesieleri sýbsidiialandy, 5 myńnan astam kásipkerge kepildik usynyldy jáne 100 myńnan astam azamat biznesti júrgizý boiynsha jáne kásipkerlik negizderine oqytyldy, 2 myńǵa jýyq grant berildi, 165 jobaǵa infraqurylym júrgizildi», — dedi R. Dálenov.
«Biznestiń jol kartasy – 2020» sharalary osy jyly aiaqtalady. Sondyqtan baǵdarlamanyń jańa jobasy ázirlendi.
QR ulttyq ekonomika ministriniń aitýynsha, jobada maqsattar men mindetter saqtalǵan, qoldaý quraldary jetildirilgen. Olardyń tiimdiligi men qoljetimdiligi artty.
-
Ainalym qarajatyn nesieleý kólemi 60-tan 360 mln teńgege deiin ulǵaiady.
-
Qarjylandyrýdyń qoljetimdiligi arttyrylýda. Bul úshin mikroqarjy uiymdardyń nesielerin sýbsidiialaý jáne kepildendirý engiziledi.
-
Baǵdarlama qatysýshylaryna jumyspen qamtý jáne salyq túsimderin arttyrý talaby jetildirildi.
-
Kásipkerlerdi ár satyda súiemeldeý kúsheitiledi. Bul — oqytý, nesie jáne qoldaý alý úshin tiisti qujattardy daiyndaý jáne taýarlardy ótkizý joldaryn uiymdastyrý.
R. Dálenovtyń aitýynsha, Baǵdarlamanyń kelesi kezeńine 421 mlrd teńge qarastyrylǵan. Qarjylandyrý ótken bes jyldyq kezeńge qaraǵanda bir jarym esege ulǵaiady.
«Biznestiń jol kartasy – 2025» baǵdarlamasynda nysanaly indikatorlar kózdelgen. Olar elimizdiń 2025 jylǵa deiingi Strategiialyq damý josparyna sáikes keledi. Jalpy ishki ónimdegi shaǵyn jáne orta biznestiń úlesin kem degende 35%-ǵa, óńdeýshi ónerkásiptiń úlesin keminde 13,4%-ǵa jetkizý kózdelgen», — dedi QR ulttyq ekonomika ministri.
Aita keteiik, shaǵyn jáne orta biznestiń údemeli damýy ekonomikanyń sapaly ózgerýine yqpal etedi. Biznesti júrgizý sharttary túbegeili jaqsarady. Kedergiler tómendetiledi jáne ruqsat berý qujattarynyń tizbesi qysqarady. Shaǵyn jáne orta biznesti damytý úshin yntalandyrý sharalary qabyldanýda.
«Bizdiń mindetimiz – iskerlik ortany jetildirý, bul ekonomikanyń ósýine yqpal etedi. 2025 jyly ekonomikanyń úshten birinen astamy shaǵyn jáne orta bizneske tiesili bolady. Al 2050 jylǵa qarai shaǵyn jáne orta biznes jalpy ishki óniminiń jartysyn quraidy», — dep túiindedi R. Dálenov.
Óz kezeginde «Atameken» UKP basqarma tóraǵasy A. Myrzahmetov biznesti júrgizý negizderin oqytý jáne kásipkerlerge keńester berý boiynsha júrgizilip jatqan jumystar týraly baiandady. Onyń aitýynsha, qoldanystaǵy biznesti júrgizýge servistik qoldaý 200 myńnan astam kásipkerlik sýbektilerine kórsetildi, monoqalalarda, shaǵyn qalalarda jáne aýdan ortalyqtarynda 500 myńnan astam kásipkerge aqparattyq qoldaý kórsetildi.
«96 myńnan astam kásipker “Biznes-mektep” komponentteri boiynsha treningterden ótti, 2 myńnan astam biznes sýbektileri “Iskerlik qatynastar” boiynsha ótti, 174 kásipker Germaniiada iskerlik taǵylymdamadan ótti. “Aǵa senorlar” quraly aiasynda 215 sarapshylyq missiia uiymdastyryldy. 26 984 kásiporyn ashyldy, 19 553 ruqsat qujaty daiyndaldy, 649 mlrd teńge somasyna qarjylandyrýǵa kómek kórsetildi. Kásipkerlerdiń 45 500 jobasy súiemeldenip, 2 mln eýro somasyna 24 kelisimshartqa qol qoiyldy (94 kompaniia). 2015 jyldan bastap 2019 jyldyń I toqsanyna deiin 97 147 kásipker biýdjetke 811 mlrd teńge kóleminde salyq tóledi», — dedi A. Myrzahmetov.
