Qasym-Jomart Toqaev pen Nursultan Nazarbaev alǵash ret 1985 jyly Beijińde kezdesken, dep habarlaidy Aqordanyń baspasóz qyzmeti.
"Ol kezde Nursultan Nazarbaev - KSRO Joǵarǵy keńesiniń depýtaty, KOKP Ortalyq komitetiniń múshesi retinde resmi saparmen Beijińde boldy. Maǵan onymen sóilesýdiń sáti tústi. Nursultan Ábishuly Beijińge Gorbachevtyń belgili saparyna deiin tórt jyl buryn barǵan bolatyn. Gorbachev barǵanda Keńes Odaǵy men Qytai arasyndaǵy bailanystyń qalypqa kelýi týraly jariialanǵanyn bilemiz. Iaǵni Nursultan Ábishuly Nazarbaev sol kezdegi eki iri sotsialistik, iadrolyq derjavalardyń qarym-qatynasyn jaqsartýǵa úles qosty dep aitýǵa bolady", - dep eske túsirdi Toqaev.
Kelesi kezdesý 1992 jyly Máskeýde bolǵan.
"Sizder jaqsy biletin meniń kareram osylai bastaldy. Danial Ahmetov ekeýmizge úkimet basqarý isi senip tapsyryldy. Eki jarym jyldai jumys istedik. Bul kezeńde rekordtyń kórsetkishke qol jetkizdik. Ekonomikalyq ósim – 13,5 protsent boldy. Bul rekordty áli birde-bir úkimet oryndaǵan joq. Sol jyldary óńdeý ónerkásibiniń ósimi alǵash ret Qazaqstannyń óndirýshi indýstriia salasynan asyp tústi. Biz qalalardy damytý, importty almastyrý baǵdarlamalaryn qolǵa aldyq. Aýyr kezeń bolatyn. Munai quny nebári 10 dollar edi. Qiyn boldy, aqsha bolǵan joq. 2 mlrd teńge úshin Úkimette óte qyzý pikirtalas bolatyn. Árbir tiyndy únemdedik", - dedi Toqaev.
Budan soń Nursultan Nazarbaev úkimetke tapsyrma berdi.
"Sondyqtan men Úkimetke biýdjetti tolyqtai jańasha qarastyrý kerektigin aitamyn. Aqshany únemdep, jinaý kerek. Qazirgi jaǵdai jaqsy. Munai quny - 70 dollar. Alaida energiialyq resýrstarǵa ǵana senip otyrýǵa bolmaidy. Aqshany aqylmen jumsaý kerek. Bul úkimetke beriletin alǵashqy tapsyrma. Ekinshiden, ekonomikany ártaraptandyrý, shaǵyn jáne orta biznesti damytýdy qolǵa alý kerek. Qazir bul salalarda nátije qýantarlyq emes", - dedi Toqaev.
Toqaev 90-shy jyldardyń basynda Qazaqstannyń bolashaǵyna senbegender kóp bolǵanyn aitty.
"Zbignev Bjezinskii syndy belgili mamannan bastap Mihail Gorbachevke deiin Qazaqstannyń bolashaǵyna qatysty jaqsy boljam jasaǵan joq. Olar Qazaqstannyń táýelsiz memleket retinde bolashaǵy joq degen bolatyn. Ol kezde demografiialyq jaǵdai qiyn, shekara ashyq edi. Ekonomika birjaqty ári álsiz bolatyn. Tuńǵysh prezidentimizdiń arqasynda bul boljamdardyń bári joqqa shyqty. Qazir Qazaqstan investitsiia tartý kórsetkishi boiynsha da adam basyna shaqqanda postkeńestik elder arasynda birinshi orynda. Bul memleketimizdi álemdik qaýymdastyqtyń moiyndap otyrǵanyn kórsetedi. Sondyqtan ustanǵan baǵytymyzdy jalǵastyrý kerek ekenin aitamyn. Qazaqstan-2030, Ult jospary, institýtsionaldy reformalar baǵdarlamasyn júzege asyrýymyz kerek. Tabysty bolýdyń syry osyndai. Sizderge senim artamyn",- dep túiindedi sózin Toqaev.
