Qorǵanys ministrligi respýblikalyq biýdjetti igerý turǵysynan barlyq ministrlikterdiń sońynda qaldy. Bul týraly Úkimet otyrysynda Qarjy ministri Baqyt Sultanov málim etti, dep habarlaidy QazAqparat tilshisi.
«Respýblikalyq biýdjet shyǵystary 3 684,5 mlrd teńgege igerildi. Igerilmeý somasy 58,4 mlrd teńgeni qurady», - deidi Baqyt Sultanov.
Qarjy ministriniń baiandamasyna qulaq assaq, igerilmegen eń úlken qarajat kelesi vedomstvolarda qalyptasqan: qańtar-mamyr aralyǵynda Qorǵanys ministrligi - 17,2 mlrd teńgeni, Aýyl sharýashylyǵy ministrligi - 8,5 mlrd teńgeni, al Ishki ister ministrligi 5,4 mlrd teńgeni igere almaǵan. Bul rette Mádeniet jáne sport ministrliginiń úlesi 7,8 mlrd teńgeni, Qarjy ministrliginiń úlesi 3,3 mlrd teńge, Ulttyq qaýipsizdik komitetiniń igerilmegen somasy 3,4 mlrd teńgeni, Joǵarǵy sottyń úlesi 1,8 mlrd teńgeni quraǵan.
Ministrdiń aitýynsha, 1 maýsymdaǵy jaǵdai boiynsha 178,6 mlrd teńgege mindettemeler qabyldanyp, qazynashylyqta tirkelgen. 96,9 mlrd teńgege áli de bolsa mindettemeler qabyldanbaǵan.
«Onyń ishinde 83,9 mlrd teńgesi Investitsiia jáne damý ministrligi boiynsha 25 avtojol jobalarynyń qurlysyn salýǵa keledi. Osy somanyń 46,1 mlrd teńgesine 12 maýsymǵa sheteldegi merdigerlermen qarjylyq kelisimsharttarǵa qol qoiyldy. Ótken jinalysta aitylǵanyndai, 13 jobaǵa bólingen 42,9 mlrd teńgeniń igerilmeý qaýpi bar», - deidi Baqyt Sultanov.
