Oblys ákiminiń orynbasary Batyrjan Baijumanov, QR Sybailas jemqorlyqqa qarsy is-qimyl agenttigi oblys boiynsha departamentiniń basshysy Ernar Maqajanov Taldyqorǵan qalasyndaǵy dári-dármek qoimalaryna bardy. Onda qajetti dáriniń bar-joǵy, shetelden, Almaty qalasynan kelýi, aýrýhana, emhana men dárihanalarǵa jetkizilýin qadaǵalady.
Birinshi kezekte «Medservis Pliýs» Qazaq farmatsevtikalyq kompaniiasy” JShS Taldyqorǵan qalasyndaǵy filialynyń qoimasyna bas suqty. Filial direktory Qadyrbek Kúderin dáriler keste boiynsha Almaty qalasyndaǵy ortalyq qoimadan aptasyna bir ret keletinin aitty.
– Jetkiziletin dáriniń kólemi ártúrli, keide az, keide kóp. Dárihanalardyń bergen tapsyrysyna bailanysty. Olar biz sekildi kóptegen kompaniiamen jumys isteidi. Taldyqorǵan aimaǵy boiynsha 130 dárihanamen kelisimshartqa otyrǵanbyz. Álemdi jailaǵan indetke bailanysty dál qazir suranysqa ie aspirin, paratsetamol, tsitramon sekildi dáriler jetispeidi, – degen Qadyrbek Azbaiuly virýsqa qarsy dárilerge tapsyrys kóp bolyp jatqanyn jetkizdi. Sondyqtan qoima sóresine túsken atalmysh dáriler birden dárihanalarǵa jiberiledi.
Suranysqa ie dárilerdi «SQ-Farmatsiia» JShS-nyń oblystyq filial qoimasynan keziktirdik. Olardy biz barǵan kezde júk kóliginen túsirip jatty. Eskeretin bir jait, virýsqa qarsy dári-dármek, askorbin qyshqyly jáne betperde, qolǵap sekildi quraldardyń barlyǵy tek oblystyq, aýdandyq, qalalyq aýrýhana men emhanalarǵa jetkiziledi. «SQ-Farmatsiia» JShS arqyly elimizge kórsetilgen gýmanitarlyq kómekter de Taldyqorǵan qalasynyń bólek qoimasyna kelip jatyr. Qytai, Birikken Arab Ámirlikteri, Katar, Túrkiia sekildi elderden jeke qorǵanysh quraldary: kostiýmder, kózáinekter, meditsinalyq betperdeler, bahildar qoimaǵa tústi. Olar jaqyn arada meditsinalyq uiymdarǵa taratylady.
Aimaqtaǵy meditsinalyq mekemelerdiń dári-dármekpen qamtylýyn sóz etken Batyrjan Qulaimergenuly:
– Oblystaǵy aýrýhana men emhanalardy dári-dármekpen qamtamasyz etý úshin oblys ákiminiń sheshimi boiynsha jergilikti biýdjetten 500 million teńge bólindi. Sonymen qatar 50 million teńgege virýsqa qarsy preparattar satyp alý josparlanyp otyr. Bul preparattar qaýip-qater tobyndaǵy azamattarǵa, atap aitqanda egde jastaǵylar, sozylmaly aýrýlary barlar jáne basqa da sanattaǵy azamattarǵa tegin beriletin bolady, – dedi.
Al QR Sybailas jemqorlyqqa qarsy is-qimyl agenttigi oblys boiynsha departamentiniń basshysy Ernar Maqajanov:
– 11 shildeden bastap monitoringtik toppen birge oblystaǵy 146 dárihanaǵa tekseris júrgizdik. Olardyń altaýy ákimshilik jaýapkershilikke tartyldy. Dárini óz baǵasynan qymbat satý sekildi zańbuzýshylyq anyqtalatyn bolsa, ákimshilik jaýapkershilikpen birge litsenziiasyn qaitarýǵa deiin baramyz, – dep Taldyqorǵan qalasynda zań buzý deregi anyqtalmaǵanyn aitty.
Oblys ákimdigi, oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń jáne «QR Farmatsevtikalyq qyzmetti qoldaý jáne damytý Assotsiatsiiasy» Zańdy tulǵalardyń birlestiginiń oblystyq filialymen birlesken memorandýmǵa sáikes monitoringtik top qurylǵan bolatyn. Monitoringtik top qoimaǵa kelgen dárilerdiń qajetti jerge jetkizilýi, baǵasy, dárihanada jetispeýshiligin árdaiym baqylaýda ustaidy. Sonymen birge zańbuzýshylyqtyń oryn almaýyn qadaǵalaidy.
Osy ýaqytqa deiin oblystyń aýdan, qalalaryndaǵy dárihanalarda dári-dármekterdiń bar-joǵy jáne olardyń baǵasyna tekseris jumysy júrgizildi. Aitalyq, Panfilov, Kóksý, Qarasai, Eńbekshiqazaq, Sarqan, Balqash, Qaratal, Jambyl aýdandary men Taldyqorǵan qalasynda ótken tekseris kezinde Memorandým qosymshalarynyń tiziminde kórsetilgen dárilerge baǵany kóterý deregi tirkelmegen. Tek dárini qymbat satqan Ile aýdanynda 2 dárihana, Uiǵyr, Talǵar, Kerbulaq aýdandary men Qapshaǵai qalasynda 1 dárihanadan anyqtalyp, barlyǵy ákimshilik jaýapkershilikke tartyldy. Tekseris jumystary jaǵdai turaqtanǵanǵa deiin jalǵasady.
Máýlen ÁNERBAI,
"Jetisý" gazeti
