Búgin Parlament Senatynyń jalpy otyrysynda palata depýtattary «2021 – 2023 jyldarǵa arnalǵan respýblikalyq biýdjet týraly» zań jobasyn talqylady. Qujatqa tolyqtyrýlar engizilgendikten, zań jobasy Májiliske qaitaryldy, dep habarlaidy "Ult aqparat".
Depýtat Nurlan Qylyshbaev respýblikalyq biýdjet jobasy óziniń áleýmettik baǵytyn saqtai otyryp, Memleket basshysy qoiǵan mindetterge sáikes keletinin atap ótti. Alaida zań jobasyn talqylaý barysynda Senattyń komitetteri men depýtattarynan memlekettiń tynys-tirshiliginiń túrli salalaryna qatysty ózgerister men tolyqtyrýlar boiynsha usynystar kelip tústi.
«Úsh jyldyq kezeńge 20 mlrd teńgege usynystar qoldaý tapty, onyń ishinde 2021 jylǵa 15 mlrd teńge», - dep naqtylady senator.
Shyǵystardy qaita bólý negizinde qosymsha qarjylandyrý kelesi baǵyttar boiynsha júzege asyrylady:
- gazdandyrýǵa jalpy somasy 2,7 mlrd teńge, onyń ishinde 2021 jylǵa – 2,1 mlrd teńge;
- turǵyn úi salý jáne qaita jabdyqtaýǵa jalpy somasy 6 mlrd teńge, onyń ishinde 2021 jylǵa – 4 mlrd teńge,
- infraqurylymdyq jáne ózge de jobalar 6,7 mlrd teńge, onyń ishinde 2021 jylǵa - 4,6 mlrd teńge.
2021-2023 jyldarǵa arnalǵan respýblikalyq biýdjet: qarajattyń jartysynan astamy áleýmettik salaǵa jumsalady.⠀
Senat tóraǵasy Máýlen Áshimbaev syrtqy naryqtaǵy kúrdeli jaǵdaiǵa bailanysty daǵdarysqa qarsy keshendi is-sharalardy qarjylandyrý jalǵasa beretinin atap ótti. Biýdjetti qaraý barysynda aldaǵy úsh jylda azamattardyń áleýmettik máselelerin sheshýge basymdyq berildi. Soǵan sáikes 2021 jyly biýdjet shyǵyndarynyń 50 paiyzdan astamy áleýmettik salaǵa jumsalady. ⠀
Sonymen qatar ol ekonomikadaǵy qiyndyqtarǵa qaramastan, Prezidenttiń tapsyrmasy boiynsha biýdjette barlyq áleýmettik mindetterdi oryndaýǵa kerekti qarjy qarastyrylǵanyn jetkizdi. Bul qarajat áleýmettik tólemderdi indeksatsiialaýǵa, muǵalimder men dárigerlerdiń jalaqylaryn kóbeitýge jáne halyqqa meditsinalyq qyzmet kórsetýge baǵyttalady.
«Elimiz úshin asa mańyzdy bolyp sanalatyn – infraqurylymdy damytý, ortalyq jáne soltústik óńirlerdi gazdandyrý, aýyz sýmen qamtamasyz etý máseleleri de nazardan tys qalǵan joq. Memleket basshysynyń tapsyrmasyna sáikes, aitarlyqtai qarjy shaǵyn jáne orta biznesti qoldaýǵa ári áleýmettik az qamtylǵan azamattarǵa arnalǵan baspana qurylysyna bólinedi», – dedi Senat tóraǵasy.
