Byltyrdan beri Qytai aýmaǵynda turyp qalǵan qazaqstandyq 1300-ge jýyq konteiner Qazaqstanǵa kelip, ári qarai biznesmenderdiń kelisimsharttyq mindettemelerine sáikes basqa elderge bet aldy, dep habarlaidy QazAqparat ulttyq kásipkerler palatasyna silteme jasap.
Qazirgi kezde Qytai 45 konteinerdi Lianiýngan portynan shyǵarý jónindegi josparǵa qosty, taǵy 96 konteiner Qazaqstan shekarasyna jol tartty.
«Subaru Kazakhstan» JShS konteinerleri Qytai aýmaǵynda 5 ai boiy turyp qalǵan. Jaqyn kúnderi konteinerler Qazaqstanǵa jetti. Júktiń keshigýi kompaniia úshin qosymsha shyǵyn boldy.
«Bizdiń kompaniiamyz sapaly bólshekterdi Japoniiadan satyp alady. Qytaimen shekarada bólshekterdiń turyp qalýyna bailanysty qarjylai shyǵyn ósti. Bul jait tehnikanyń bastapqy qunyna teris áser etedi. Sonymen qatar, biz Subaru-dyń resmi distribiýtorymyz jáne zaýyttan kepildik beremiz. Demek, qosalqy bólshekterdi jetkizýdegi kez kelgen kidiris klientterimizdi kútýge, al bizdi olardyń aldyndaǵy mindettemelerimizdi buzýǵa májbúr etedi», – dedi «Subaru Kazakhstan» JShS direktory Aqylbek Anarbaev.
«Atameken» UKP mamandarynyń aitýynsha, Qytaidan júk tielgen konteinerler elge kele jatyr. Ulttyq palata osy turyp qalǵan júkter týraly derekterdi 2021-2022 jyldar aralyǵynda salalyq vedomstvolar men «Qazaqstan temir joly» kompaniiasyna habarlaǵan.
«Qazir biz oń dinamikany baiqap otyrmyz. Ulttyq palata 1342 konteiner týraly derektermen taǵy bir tizimdi jiberdi. Sol tizimdegi turyp qalý merzimi tym uzaryp ketken. Shekarada 1-den 4-ke deiin konteineri bar shaǵyn jáne orta biznes sýbektileriniń júkteri 6-7 aidan astam ýaqyt turyp qalǵan. Bul tizim boiynsha ilgerileýdi kórip otyrmyz», – dep atap ótti «Atameken» QR UKP tóralqa tóraǵasy Raiymbek Batalov.
UKP 2022 jyly Úkimetpen birlesip, konteinerlerdi jóneltýdi jedeldetý mehanizmin ázirledi.
Palata turyp qalǵan konteinerler týraly derekterdi QTJ, Indýstriia jáne infraqurylymdyq damý ministrligi jáne Syrtqy ister ministrligine jiberedi.
Memlekettik organdar Qytai tarapymen qozǵalys josparyna Qazaqstan konteinerlerin engizý múmkindigin naqty pysyqtap jatyr.
Biznesmenderden Qytaida turyp qalǵan konteinerlerge qatysty shaǵymdar 2020 jyldan bastap túsip jatyr.
