2019 jyly Qazaqstanda qaýipti óndiris nysandarynda 28 oqys oqiǵa tirkeldi, onda 11 adam qaza tapqan, dep habarlaidy "Ult aqparat" QR IIDM Indýstriialyq damý jáne ónerkásiptik qaýipsizdik komitetine silteme jasap.
Byltyrǵy oqys oqiǵalar kezinde 24 adam zardap shekken, onyń ishinde 11 adam qaza tapsa, 7 adam aýyr, 6 adam jeńil dárejede jaraqat alǵan.
Komitettiń málimdeýinshe, barlyq apattar egjei-tegjeili tergelip, tiisti sharalar qabyldandy.
áOqys oqiǵalar kómir, taý-ken, metallýrgiia, munai-himiia, munai-gaz óndirý, jarylys jumystaryn júrgizetin obektilerde, qazandyq jáne gaz sharýashylyqtarynda, kótergish qurylystarda oryn alǵan.
Tekserý aktilerine sáikes jazataiym oqiǵalardyń negizgi sebebi eskirgen, moraldyq jáne fizikalyq turǵydan tozǵan, qyzmettiń normativtik merzimin ótegen jabdyqtardy paidalanýdan», delingen habarlamada.
Osy máseleni sheshý úshin QR IIDM Indýstriialyq damý jáne ónerkásiptik qaýipsizdik komitetiniń bastamasy boiynsha kásiporyndarmen birlesip jyl saiyn tehnikalyq qaita jaraqtandyrýdyń jiyntyq jospary ázirlendi, qazirgi ýaqytta 1 424 tehnikalyq qurylǵy men 66 tehnologiialyq jeli aýystyryldy.
Mamandardyń málimeti boiynsha, tirkelgen oqys oqiǵalardyń kelesi sebebi –ónerkásiptik qaýipsizdik talaby men erejesin buzý. Úshinshiden, óndiristik baqylaýdyń tómen bolýy, ia bolmasa tipti júrgizilmeýi jáne qyzmetkerlerdiń biliktiliginiń tómendigi.
«Osyǵan bailanysty ónerkásiptik qaýipsizdik salasyndaǵy normativtik quqyqtyq bazany odan ári jetildirý maqsatynda Qazaqstan Respýblikasy Úkimetiniń 2019 jylǵa arnalǵan zań jobalaý qyzmeti sheńberinde ónerkásiptik qaýipsizdik máseleleri jónindegi zań jobasy ázirlendi jáne Májilisine engizildi.
Zań jobasy ónerkásiptik qaýipsizdik salasyndaǵy zańnama normalaryn jetildirýge jáne memlekettik qadaǵalaýdy júzege asyrýdyń tiimdiligin arttyrýǵa baǵyttalǵan», delingen habarlamada.
Budan bólek, komitet qyzmetkerleri munai jáne gaz salalarynyń qaýipti óndiris obektileri úshin ónerkásiptik qaýipsizdikti qamtamasyz etý erejelerin qaita qarady. Sondai-aq qazirgi zamanǵy normalarǵa jáne halyqaralyq tehnologiialyq talaptarǵa sáikes atalǵan normativtik quqyqtyq aktilerdi jan-jaqty qaraý jáne olarǵa ózgerister engizý josparlanǵan.
Indýstriialyq damý jáne ónerkásiptik qaýipsizdik komiteti 221 myńnan astam qaýipti óndiristik obektilerdi qamtityn 9 myńǵa jýyq kásiporynda ónerkásiptik qaýipsizdik salasynda memlekettik qadaǵalaýdy júzege asyrady. Negizinen bul kenishter men kómir shahtalary, karerler, metallýrgiialyq, himiialyq jáne munai óńdeý zaýyttary, magistraldy qubyrlardyń atom ónerkásibi obektileri jáne basqalar.
«2019 jyly óndiris oshaqtarynda 1447 tekserý júrgizildi. Tekserý qorytyndysy boiynsha barlyǵy 50 193 zań buzýshylyq anyqtaldy. 168 mln teńgeden astam qarjyǵa 1 885 aiyppul salyndy, onyń 1 422-si zańdy tulǵaǵa jáne 463-i jeke tulǵaǵa», delingen habarlamada.
