Ótken jyldyń tamyz aiynda asa iri kólemde aqsha jymqyrdy degen aiyppen 4 jylǵa bas bostandyǵynan aiyrylǵan eks-depýtat Meiirjan Óndirgenov úlgili tártibi úshin merziminen buryn bostandyqqa shyqty, - dep habarlaidy kaz.tengrinews.kz tilshisi Aqtóbe oblystyq sotynyń baspasóz qyzmetine silteme jasap.
Mundai qaýlyny sot 30 maýsymda shyǵarypty. Aita keteiik, ol Aqtóbe oblysynyń qylmystyq ister jónindegi mamandandyrylǵan aýdanaralyq sotynyń 2016 jyldyń 1 tamyzyndaǵy úkimimen QR QK-niń 190 babynyń 4-bóliginiń 2-tarmaǵymen alaiaqtyq, iaǵni memlekettik biýdjetti adamdar tobynyń aldyn-ala sóz bailasýymen, aldaý arqyly, asa iri mólsherde jymqyrǵany úshin kináli dep tanylǵan edi. Al kompaniianyń vitse-prezidenti Ádilov Erbol Ótegenuly 3 jyl merzimge bas bostandyǵynan airylyp, jaza óteý orny jalpy rejimdegi túzetý koloniiasy belgilengen bolatyn. Olarǵa atalǵan úkimmen múlikteri tárkileý qosymsha jazasy taǵaiyndalǵan.
Sonymen qatar, Óndirgenovtyń úiinde, jumys ornynda jáne bank esepshottarynda tabylǵan jáne alynǵan 3 million 292 myń 178 AQSh dollary, 1 million 811 myń 654 eýro, 161 791 teńge, 326 300 resei rýbli jáne bank esep shotyndaǵy 84 million 583 myń 480 teńge, 89 myń 259 AQSh dollary sot úkimi zańdy kúshine engennen keiin, 900 million 542 myń teńge kóleminde keltirilgen zalaldy jabý úshin jáne memleket paidasyna óndiriletini belgili bolǵan edi.
Óndirgenovtiń sottalýyna bailanysty, sot QR Prezidentiniń atyna ony memlekettik nagradasynan ("Qurmet" ordeni) aiyrý týraly usynys keltirilgenin de aita keteiik.
Eske salaiyq, Meiirjan Óndirgenov 2016 jyldyń 30 mamyrynda asa iri kólemde qarjy bopsalady jáne óltiremin dep qorqytty degen kúdikpen ustalǵan bolatyn.
