2016 jyly 16 myń 417 otbasy nemese 33 myń 754 etnikalyq qazaq tarihi Otanyna qaita oralyp, oralman mártebesin aldy, dep habarlaidy "Ult aqparat" QR Eńbek jáne halyqty áleýmettik qorǵaý ministrliginiń baspasóz qyzmetine silteme jasap.
Qazaqstanǵa kelgen oralmandardyń kópshiligi, iaǵni, 65,5% - Ózbekstannan kelgen. Sondai-aq, 24,9% - Qytaidan, 3,2% - Túrikmenstannan, 2,7% - Mońǵoliiadan, 3,7% - ózge elderden oralǵan qandastarymyz.
Olardyń basym bóligi, iaǵni 33,9% - Ońtústik Qazaqstan oblysyna, 25,4% - Almaty oblysyna, 10,6% - Mańǵystaý oblysyna, 5,8% - Jambyl oblysyna, 24,3% - elimizdiń ózge óńirlerine qonystandy.
Elge oralǵan qandastarymyzdyń 65,4% - eńbekke qabiletti jasta bolsa, 16 jasqa deiingileri – 28,6%, zeinetkerler - 6% quraidy.
Eńbekke jaramdy etnikalyq qazaqtardyń 10,8%-nyń joǵarǵy bilimi bar bolsa, 20,3%-ynda orta arnaýly bilim bar, 65% - jalpy orta bilimi bar azamattar, al 3,9%-nyń bilimi joq.
Esterińizge sala keteiik, «Keibir zańnamalyq aktilerge halyqtyń kóshi-qony jáne jumyspen qamtylýy máseleleri boiynsha ózgerister men tolyqtyrýlar engizý týraly» QR Zańynda etnikalyq qazaqtardy tarihi otanyna oralýyn yńtalandyrý maqsatynda:
- etnikalyq qazaqtarǵa qonystaný óńirine qaramastan oralman mártebesin berý. Olarǵa sheteldik azamattarǵa qaraǵanda kóshi-qon politsiiasyna habarlasý arqyly tólem qabiletin rastaýsyz ýaqytsha turý yqtiiarhatyn alý múmkindigi beriledi;
- etnikalyq qazaqtarǵa Úkimet belgilegen óńirlerge qonystanǵan jaǵdaida áleýmettik paket berý. Sondai-aq, elimizdiń kez kelgen óńirinen Úkimet aiqyndaǵan ekinshi óńirge qonystanǵan oralmannyń áleýmettik qoldaýdy alýǵa múmkindigi bolady. Eger olar qonystanǵan óńirden 5 jyl merzimnen buryn qonys aýdaryp ketetin bolsa, alǵan kómekterin Úkimetke qaitarý mindetteri qarastyrylǵan.
- oralmandarǵa Qazaqstan Respýblikasynyń azamattyǵyn berý merzimin ýaqytsha turý yqtiiarhatyn alǵannan keiin 1 jylǵa deiin qysqartý kózdeledi.
