Tarazda politseiler buzylǵan kóliktiń júrgizýshisine kómekteskendigi týraly video áleýmettik jelide keńinen taralyp, kópshiliktiń yqylasyna ie boldy,- dep habarlaidy "Ult aqparat".
Instagram jelisinde tarazdyq patrýldik politsiia qyzmetkerleriniń kóligi jolda buzylyp qalǵan júrgizýshige kómekteskeni týraly video taraǵan bolatyn.
Oblystyq politsiia departamentiniń baspasóz qyzmetinái málimetinshe, kúndizgi patrýldeý kezinde Tóle bi men Jeltoqsan kósheleriniń qiylysynda Taraz qalasynyń PB PPB qyzmetkerleri toqtap turǵan Toyota Camry kóligin baiqaidy.
Kólik júrgizýshisi birneshe ret joldan shyǵyp ketýge tyrysqanymen, kólikti qozǵalta almaǵan. Osy sátte júrgizýshiniń janyna tártip saqshylarynyń qyzmettik kóligi kelip toqtaidy.
Kóliginiń júrmeitinine kózi jetken júrgizýshi politseilerdi kórip qýanyp ketedi. Avtokólikti júrgizýshimen birge joldyń shetine iterip shyǵarǵan ofitserler onyń benzini taýsylǵanyn anyqtaǵan.
Politseiler qolaisyz aýa raiyn eskere otyryp, birden janarmai quiý beketine baryp, qajetti janarmai ákelip beredi. Óz kezeginde avtokólik iesi politsiia qyzmetkerlerine kórsetilgen kómek úshin rizashylyǵyn bildirip, qyzmetine sáttilik tiledi.
«Qazir kún sýyq, birneshe kúnnen beri qar jaýyp tur, toqtap turǵan kólik jol apatyn týdyrýy múmkin. Patrýldeý kezinde qinalyp turǵan júrgizýshini baiqadyq. Dereý kómek kórsetý týraly sheshim qabyldadyq. Bizdi bireý videoǵa túsirip, áleýmettik jelige taratady dep múlde oilamadyq. Biz tek qoldan kelgenshe kómektesýge tyrystyq. Jolda mashinanyń buzylyp qalýy jii kezdesedi, biz árqashan kómektesýge daiynbyz», - dep atap ótti saqshylar.
