Dúisenbide BUU-nyń Adam quqyqtary jónindegi joǵarǵy komissary Mishel Bachelet Resei Ýkrainaǵa basyp kirgen bes kún ishinde kemi 102 beibit adam qaza bolǵanyn, onyń jeteýi bala ekenin málimdedi jáne ólgen adamdar sany munan da kóp bolýy múmkin ekenin eskertti.
"Beibit adamdardyń kóbi aýyr artilleriia men reaktivti atys qarýlary oǵynyń úlken jarylysynan jáne áýeden atylǵan snariad jarylysynan ólgen" dedi ol.
Bachelet Ýkrainanyń milliondaǵan adamy qaýip-qaterden qashyp, metro men jertólede bas saýǵalaýǵa májbúr bolyp otyrǵanyn aitty.
Onyń sózinshe, BUU Bosqyndar isi jónindegi agenttigi Ýkrainadan 368 myń adamnyń bosqyn retinde shyǵyp ketkenin, Ýkraina ishinde bosyp júrgender de kóp ekenin eseptep otyr.
Bachalettiń sózi BUU Adam quqyǵy jónindegi keńesiniń jyl saiynǵy negizgi sessiiasy bastalar qarsańda aityldy. Sessiia Ýkrainadaǵy urys qimyldary boiynsha jedel pikir almasý jóninde daýys berýden bastaldy.
Pikir almasýdy talap etken Ýkraina osy sessiiada Máskeýdiń Ýkrainaǵa qarsy áreketin tergeýge shaqyratyn rezoliýtsiia usynýy múmkin. Resei Ýkrainanyń pikir almasý jónindegi ótinishin daýysqa salýǵa qarsy shyqty, biraq keńestiń 47 múshesiniń kópshilik daýysymen Kievtiń ótinishi qoldaý tapty.
BUU-nyń Jenevadaǵy bóliminiń ókili Evgeniia Filipenko Reseidiń áreketin halyqaralyq qaýymdastyqqa shabýyl dep baǵalady. "Bul tek Ýkrainaǵa jasalǵan shaýyl emes, bul – BUU-nyń árbir múshesine, osy uiym qorǵaityn ustanymdarǵa shabýyl" dedi ol.
Onyń sózinshe, shabýyl bastalǵaly bes kún ishinde 350-den astam adam óltirilgen. Onyń 16-sy balalar.
26 aqpanda Ýkrainanyń densaýlyq saqtaý ministri Viktor Liashko Resei shabýylynan 198 adam ólip, myńnan asam adam jaralandy dep málimdegen. Resei soǵys qurbandaryn aitpai otyr. Reseidiń qorǵanys ministrligi áskeriler arasynda ólgender bar ekenin moiyndady.
