BUU Bas assambleiasy Resei anneksiialap alǵan Qyrymda adam quqyqtarynyń buzylǵanyn qatań aiyptap, Reseidi túbektegi "okkýpatsiia jasaityn kúsh" dep baǵalaityn qarardy maquldady, dep habarlaidy "Ult aqparat" Azattyqqa silteme jasap.
Ýkraina men basqa 30 el usynǵan qarardy 70 memleket qoldady. 26 memleket, onyń ishinde Resei, Belarýs, Qazaqstan jáne Qytai qararǵa qarsy daýys berdi. 36 memleket qalys qaldy. Ýkrainanyń BUU-daǵy turaqty ókildigi qarar Ýkraina men Resei arasynda qarýly qaqtyǵys bolǵanyn rastaitynyn jáne Máskeý 2014 jyly anneksiialap alǵan territoriiada Resei zańdarynyń shekten tys qoldanylǵanyn aiyptaitynyn aitty. Ýkrainanyń syrtqy ister ministri Pavel Klimkin "bul qarar - BUU qabyldaǵan «eń qatań» qararlarynyń biri" ekenin málimdedi. «Reseige qysym kúsheiip barady» dep jazdy Klimkin Twitter-de. Bas assambleia Qyrymdaǵy adam quqyqtarynyń buzylǵanyn aiyptaityn alǵashqy qararyn byltyr qabyldaǵan.
BUU-daǵy ýkrain diplomattary Reseidiń BUU-na múshe memleketterge qararǵa qarsy daýys berý nemese qalys qalý úshin «úlken qysym jasaǵanyn» aitty. Resei qyrymdyqtar 2014 jyly naýryzda ótken referendýmda Reseige qosylýǵa daýys berdi dep biledi. Biraq halyqaralyq qaýymdastyq ol referendýmdy zańsyz ótkizildi dep, moiyndamaǵan. Ýkrainanyń BUU-daǵy ókildigi qarar Resei basyp alǵan territoriiadaǵy Ýkraina azamattaryn kúshtep qolastyna alýdy aiyptap, zańsyz tutqynda otyrǵan ýkraindyqtardy bosatýǵa shaqyratynyn aitady. Qarar Qyrymdaǵy adam quqyǵyn buzýdyń barlyq túrin, onyń ishinde «jónsiz ustap, azaptaýdy jáne basqa da adamshylyqqa jat áreketterdi» dereý toqtatýǵa úndeidi.
