Frantsiia Batystyń basqa birqatar memleketimen birge BUU-nyń násilshildikke qarsy konferentsiiasyna jiynnyń "ótken tarihynda (birqatar) antisemittik málimdemeler aitylýyna" bailanysty boikot jariialady.
Frantsiia prezidenti Emmanýel Makronnyń keńsesi 13 tamyzda BUU-nyń násilshildikke qarsy konferentsiiasynyń kelesi otyrysyna qatyspaitynyn habarlady. Buǵan deiin, 2001 jyly Ońtústik Afrika qalasynda ótken bul shara sonyń atymen – Dýrban konferentsiiasy dep atalady. Onyń qorytyndysynda Dýrban deklaratsiiasy men Násilshildikke qarsy áreket baǵdarlamasy qabyldanǵan.
Dýrban konferentsiiasynyń 20 jyldyq mereitoiyna orai kelesi aida Niý-Iorkte jiyn ótkizilmekshi. Osy sharada taǵy da antisemittik belsendilik boi kórsete me dep alańdaǵan AQSh, Ulybritaniia, Avstraliia, Izrail jáne basqa da Eýropanyń birqatar eli biylǵy kezdesýge boikot jariialaitynyn málimdegen.
Dýrban konferentsiiasy Izrail men Palestinaǵa qatysty túrli taraptardyń daý-damaiyna, sonymen birge quldyqtyń qazirgi murasy jaily pikir qaqtyǵysyna toly boldy. (Dýrbanda 20 jyl burynǵy jiynda) AQSh, Kanada jáne Izrail delegatsiialary Izraildi synaǵan jáne sionizmdi násilshildikke uqsatqan rezoliýtsiia jobasyn talqylaý barysynda jiynnan shyǵyp ketken bolatyn. Biraq atalǵan synaý men teńeýdi qamtityn mátin jobasynyń tustary konferentsiianyń qorytyndy qujattary mazmunynan alynyp tastalyp, onyń mazmuny násilshildikti, násiline bolý kemsitýdi, ksenofobiia men (bóten pikirine) tózimsizdikti aiyptaityn jáne ondaidy túbirimen joiýǵa shaqyratyn formada qabyldanǵan edi.
