Niý-Iorkte Birikken Ulttar Uiymy Bas Assambleiasynyń 75-sessiiasy ótip jatyr. Onyń barysynda uiymnyń Bas hatshysy Antoniý Gýterrish málimdeme jasady, dep habarlaidy QazAqparat.
«Osynaý ataýly data qarsańynda hatshylyq (BUU Bas Assambleiasynyń hatshylyǵy) búkil álemde millionnan astam adamdy qamtyǵan jahandyq talqylaýdy ótkizip, onyń aiasynda ásirese, jastardyń daýysyna basymdyq berdi. Talqylaýǵa qatysýshylardyń barlyǵy da ózderiniń qorqynyshymen, bolashaqqa degen úmitimen bólisti. Olar búgingi kúnniń ózekti problemalaryn sheshý úshin halyqaralyq yntymaqtastyq ómirlik mańyzǵa ie bolyp otyrǵandyǵyn aitýda. COVID-19 indeti jaǵdaiynda mundai yntymaqtastyqqa qejettilik barynsha ózekti bola túskendigine de mán berýde. Olar álemge densaýlyq saqtaý júiesiniń, barlyǵyna negizgi qyzmetterdi kórsetý júiesiniń qajettigin atap ótip otyr. Olar úshin BUU – bul onyń kúshimen álemde jaqsarta túsýge bolatyn qural. Olar bizdi «qazirgi synaqtarǵa abyroimen tótep beredi« dep úmit artady», - dedi Antoniý Gýterrish.
Onyń atap ótýinshe, bul rettegi jaýapkershilik BUU-ǵa múshe memleketterge artylyp otyr. Óitkeni, múshe memleketter Birikken Ulttar Uiymyn qurdy ári olar álemdi jaqsarta túsýge múmkindik beretin quraldardy paidalana otyryp, oǵan qamqorlyqpen jáne uqyptylyqpen qaraýy tiis.
«Bul – BUU halyqtary aldyndaǵy paryzymyz. Bul – ortalyq qundylyqtardyń jalǵasýy úshin ómirin qiǵan bitimgerler, diplomattar, gýmanitarlyq kómek qyzmetkerleri jáne barlyǵy aldyndaǵy – mindetimiz. Uiymymyzdy qurýshylar óz qyzmetterin janjal órship turǵan kezde bastaǵan bolatyn. Endi biz álemdi qaýipten aryltý úshin osy joldy jalǵastyrýymyz qajet», - dedi ol.
Eske salaiyq, BUU Bas Assambleiasynyń jumysyna Qazaqstan Prezidenti Qasym-Jomart Toqaev ta qatysyp, aǵylshyn tilinde eki beineúndeý jasaidy. Onyń biri - uiymnyń 75 jyldyǵyna arnalsa, ekinshisi – kún tártibindegi debatqa qatysty. Diplomattar men sholýshylardyń pikirinshe, bul jolǵy assambleia uiymnyń mereitoiynan bólek, qashyqtan ZOOM-diplomatiia túrinde ótetinimen erekshelenedi.
Búgin merekelik bólimdegi shaǵyn resmi rásimde Antonio Gýtterish shtab-páterde bolyp, sóz sóileitinin buǵan deiin habarlaǵan bolatynbyz.
