COVID-19 pandemiiasy oshaqtarynyń biri Latyn Amerika men Karib basseini aimaǵy bolyp otyr. Munda áleýmettik teńsizdik artyp, beiresmi jumyspen qamtý deńgeii joǵary. Óńirde meditsina barshaǵa qoljetimdi emes. Densaýlyq saqtaý organdarynyń jumysy barlyq jerde jolǵa qoiylmaǵan. Bul týraly BUU Bas hatshysy Antoniý Gýterrish málimdedi. Ol kedeilerge, múgedekterge, qarttarǵa, áielderge, baiyrǵy halyqtardyń ókilderine, migrant bosqyndarǵa eń úlken qaýip tónip turǵanyn eskertti. Bul týraly BUU Jańalyqtar ortalyǵy habarlady.
BUU Latyn Amerika men Karib basseinindegi pandemiianyń jaǵdaiy týraly analitikalyq málimet usyndy. Onda COVID-19 indetin toqtatý jáne daǵdarysty sátti eńserý týraly usynymdar berilgen. Qujatta teńsizdikpen kúres júrgizilmese jáne halyqaralyq kómek bolmasa óńir elderi kúizelisterge tótep bere almaityny aitylǵan.
«Qazirdiń ózinde kúshti teńsizdik, beiresmi jumyspen qamtýdyń joǵary deńgeii jáne meditsinalyq qyzmetterdiń fragmenttelýi jaǵdaiynda halyqtyń eń osal toptary óte qiyn jaǵdaiǵa tap bolyp otyr», - dedi BUU basshysy Niý-Iorktegi virtýaldy brifing barysynda.
Pandemiiaǵa bailanysty óńirde kedeilik deńgeii 7 paiyzǵa artady, osylaisha 230 million adam kedeiler sanatynda, al 96 million adam qaiyrshylar sanatynda bolady. Jumyspen qamtý deńgeii 8 paiyzdan astamǵa tómendeidi. 44 million adam jumyssyz qalady. Nátijesinde teńsizdik odan ári tereńdep, nasharlaidy. Bul Latyn Amerika men Karib basseini elderinde meditsinalyq saqtandyrýǵa tabysy tómen adamdardyń 32 paiyzy ǵana ie.
«Biz virýstyń taralýyn tejeý jáne barlyq adamnyń ómiri men densaýlyǵy úshin kúresti kúsheitý maqsatynda qoldan kelgenniń bárin jasaýymyz kerek. Biraq biz buryn-sońdy bolmaǵan áleýmettik-ekonomikalyq saldarǵa qatysty sharalar qabyldaýǵa tiispiz», - dep atap ótti Bas hatshy.
BUU Bas hatshysy Latyn Amerika men Karib basseininiń halyqtaryna osyndai qiyn kezeńde tolyq qoldaý kórsetetinin málimdedi. Olardy yntymaqtastyq pen janashyrlyq qaǵidalaryn basshylyqqa alýǵa shaqyrdy. BUU basshysy «biz osy daǵdarysty birge eńsere alamyz» jáne árkim ózin jaily sezinetin jańa qoǵam qura alamyz dep sendirdi.
