BUU Bas assambleiasynyń úshinshi komiteti Qyrymdaǵy adam quqyǵy jaǵdaiyn aiyptaǵan qarar qabyldady dep habarlaidy Associated Press agenttigi.
Qujatta Qyrym turǵyndaryna, onyń ishinde Qyrym tatarlary men ýkraindyqtar jáne ózge de etnikalyq jáne dini azshylyq ókilderine qatysty kemsitýshilik pen adam quqyǵyn aiaqqa taptaý" aiyptalady. Qarar avtorlary osyǵan bailanysty Reseidi "jónsiz ustap, azaptaýdy" toqatýǵa, zańsyz sottalǵan ýkrain azamattaryn bosatýǵa, Qyrym tatarlary medjlisin ekstremistik uiym dep taný týraly sheshimin joiýǵa shaqyrady. Qujatta Resei biligin Qyrym territoriiasyna adam quqyǵy jónindegi halyqaralyq baqylaýshylardy jáne quqyq qorǵaý uiymdaryn kirgizýge shaqyratyn úndeý bar.
Qujatta Resei birinshi ret basqynshy memleket, al Qyrym men Sevastopol - ýaqytsha basyp alynǵan territoriialar dep atalady.
Reseidiń BUU-daǵy elshisi Vitalii Chýrkin qujatty "shynaiy emes jáne birjaqty" dep atap, ony qabyldamaýǵa shaqyrdy.
Ýkraina daiyndaǵan qarardy 73 memleket qoldap, 23 memleket qarsy daýys berdi. 76 memleket qalys qaldy. Qarardy Bas assambleia bir ai ishinde qaraidy.
Resei Qyrymdy 2014 jyly naýryzda reseishil bilik uiymdastyrǵan referendýmnan soń anneksiialap alǵan. Ýkraina men halyqaralyq qaýymdastyq referendým qorytyndysyn moiyndamaidy.
