13-15 qańtar aralyǵynda BUU Qaýipsizdik keńesiniń delegatsiiasy resmi saparmen Aýǵanstanda boldy, dep habarlaidy "Ult aqparat" BUU jańalyqtar ortalyǵyna silteme jasap.
Bul saparda Qaýipsizdik keńesiniń músheleri beibitshilikti nyǵaitý men damýdyń alǵa basýyna baǵyttalǵan aýǵandyqtarǵa qoldaý kórsetti. Kabýldaǵy kezdesý barysynda Qaýipsizdik keńesiniń ókilderi aýǵandyqtardy óńirlik yntymaqtastyqty nyǵaitýǵa jáne josparly túrde parlamenttik jáne prezidenttik sailaýdy ádil ótkizýge shaqyrdy.
Sapardy biyl qańtarda BUU Qaýipsizdik keńesiniń tóraǵasy bolyp tabylatyn Qazaqstan uiymdastyrdy. Delegatsiiaǵa BUU janyndaǵy Qazaqstannyń turaqty ókili Qairat Omarov basshylyq etti. Onyń quramyna Boliviia, Ulybritaniia, Ekvatorialyq Gvineia, Efiopiia, Niderlandy, Qytai, Kot-d'Ivýar, Kýveit, Perý, Polsha, Resei, Frantsiia, AQSh pen Shvetsiia elshileri kirdi.
Kabýlda Qaýipsizdik keńesiniń músheleri Aýǵanstan prezidenti Mohammad Ashraf Ganimen jáne eldiń basqa da kóshbasshylarymen, sonyń ishinde syrtqy ister, ishki ister, qarjy, saýda jáne aýyl sharýashylyǵy ministrlerimen kezdesti. Qaýipsizdik keńesiniń delegatsiiasy parlament múshelerimen, úkimettik emes uiymdardyń ókilderimen jáne saiasi partiia basshylarymen, sondai-aq BUU Missiiasy jáne NATO operatsiiasynyń basshylarymen kezdesý ótkizdi.
«Kezdesý barysynda negizgi saiasi ahýal talqylanyp, qaýipsizdik, áleýmettik-ekonomikalyq jaǵdai men eldegi adam quqyǵy máseleleri qaraldy», - delingen habarlamada.
Qaýipsizdik keńesiniń músheleri Aýǵanstan úkimetiniń reformalar salasyndaǵy, sonyń ishinde jemqorlyqqa qarsy is-qimyl salasyndaǵy bastamalaryna qoldaý kórsetti.
