«Haos. Tártipsizdik. Belgisizdik. Jáne qorqynysh». Bas hatshy Antoniý Gýterrish Aýǵanstandaǵy jaǵdaidy BUU Qaýipsizdik Keńesiniń músheleri aldynda sóilegen sózinde osylai sipattady. Niý-Iork ýaqytymen dúisenbi kúni tańerteń Qaýipsizdik Keńesi Aýǵanstandaǵy oqiǵaǵa bailanysty shuǵyl otyrysqa jinaldy. Bul týraly BUU jańalyqtar ortalyǵy habarlady.
Aqparat quraldarynyń habarlaýynsha, jeksenbide tálipter Kabýldy basyp aldy. Aýǵanstan prezidenti Ashraf Ǵani men basqa da resmi adamdar elden ketti. Myńdaǵan adamdar úileri men múlikterin tastap, Aýǵanstannan ketip jatyr. Olar «Taliban» basyp alǵan jerlerinde ornatqan zorlyq -zombylyq pen qatań tártipten qashýǵa árekettenýde. «Bul jerde kóp nárse bar. Progress. Úmit. Tutas bir urpaq - aýǵandyq jas áielder men qyzdardyń, erler men uldardyń armany», - dedi BUU basshysy óz sózinde.
«Osy qiyn sátte men barlyq taraptardy, ásirese, «Talibandy» barynsha ustamdy bolýǵa shaqyramyn».
Bas hatshy beibit turǵyndardy qorǵaý, sondai-aq gýmanitarlyq uiymdarǵa kómekke muqtaj Aýǵanstan halqyna kedergisiz qol jetkizýdi qamtamasyz etý qajettigine basa toqtaldy. Bul jaǵdaida halyqaralyq qaýymdastyq birigip, Aýǵanstandaǵy adam quqyqtarynyń, ásirese áielder men qyzdardyń qorǵalýyn qamtamasyz etý úshin jáne eldiń terroristik uiymdardyń alańy men qorǵany retinde paidalanylýyna jol bermeý úshin qoldan kelgenniń bárin jasaýy kerek.
«Men Qaýipsizdik Keńesin, jalpy halyqaralyq qaýymdastyqty Aýǵanstandaǵy jahandyq terroristik qaýip-qaterdi basý jáne adam quqyqtarynyń saqtalýyn qamtamasyz etý úshin barlyq quraldardy qoldanýǵa shaqyramyn», - dedi Gýterrish.
Onyń aitýynsha, qazirgi ýaqytta «Taliban» baqylaýyndaǵy aýmaqtarda júrgen BUU qyzmetkerlerine qurmetpen qaraidy. «Biz tálipterdi osy oraida diplomatiialyq ókilderdiń isine qol suqpaýǵa shaqyramyz», - dedi Gýterrish. Ol BUU aýǵandyqtarǵa qajetti kómek kórsetýdi jalǵastyratyndyǵyn aitty.
