Qaýipsizdik keńesi COVID-19 halyqaralyq beibitshilik pen qaýipsizdikke tóndiretin qaýip-qaterin moiyndap, búgin BUU Bas hatshysynyń jaýyngerlik is-qimyldardy jalpyǵa birdei jáne úsh aiǵa dereý toqtatýǵa shaqyrǵan úndeýin qoldady. Oq atýdy toqtatý terroristik toptarǵa qarsy operatsiialarǵa qoldanylmaidy, dep habarlaidy "Ult aqparat" BUU jańalyqtaryna silteme jasap.
Biraýyzdan qabyldanǵan qararda Qaýipsizdik keńesiniń músheleri COVID 19 pandemiiasy barlyq elge, ásirese qaqtyǵys júrip jatqan nemese gýmanitarlyq daǵdarys júrip jatqan elderge joiqyn áser etetinin atap ótti. Óz kezeginde, «janjal jaǵdailaryndaǵy zorlyq-zombylyq pen turaqsyzdyq jaǵdaiy pandemiiany órshitýi múmkin».
Buryn-sońdy bolmaǵan pandemiia «halyqaralyq beibitshilik pen qaýipsizdikti qoldaýǵa qaýip tóndire alatynyn» eskere otyryp, Qaýipsizdik keńesiniń músheleri qarýly qaqtyǵystarǵa qatysýshy barlyq tarapty keminde 90 kúnge gýmanitarlyq úzilis alýǵa shaqyrdy. Bul gýmanitarlyq qyzmetkerlerge kedergisiz jáne únemi ózine qaýip tóndirmei, muqtaj adamdarǵa qajetti kómek kórsetýge múmkindik beredi.
Alaida, qarardyń avtorlary atap ótkendei, gýmanitarlyq úzilis pen ot atýdy toqtatý IShIM, «Ál-Kaida» jáne «An-Nýsraǵa», sondai-aq olarmen bailanysty barlyq toptar men uiymdarǵa jáne Qaýipsizdik keńesi terroristik dep tanyǵan basqa da toptarǵa qarsy áskeri operatsiialarǵa qoldanylmaidy.
Keńes músheleri sondai-aq BUU-nyń barlyq bólimshelerine qarýly qaqtyǵysty nemese gýmanitarlyq daǵdarysty bastan keshirgen elderge erekshe nazar aýdara otyryp, pandemiiaǵa jaýap retinde neǵurlym belsendi is-qimyl jasaýdy usyndy. Olar BUU basshysyna BUU-nyń bitimgershilik missiialaryna «óz mandattary men múmkindikterine qarai otyryp, qabyldaýshy elderdiń bilikterine pandemiiany tejeý boiynsha kúsh-jigerine qoldaý kórsetýdi» tapsyrýǵa ókilettik berdi.
23 naýryzda BUU Bas hatshysy Antoniý Gýterrish búkil álem boiynsha qarýly qaqtyǵystardyń barlyq taraptaryna áskeri is-qimyldardy toqtatýǵa jáne COVID 19 pandemiiasymen kúresýge shaqyrdy.
«Biz násilderdi, ulttardy nemese senimderdi ajyratyp talǵamaityn bárimizge ortaq jaýǵa tap boldyq», - dep eske saldy BUU basshysy.
Sonymen qatar, búkil álem boiynsha pandemiia qaýpin kúsheitetin jáne onymen kúresýge múmkindik bermeitin áskeri qaqtyǵystar oryn alýda. Gýterrish «qarýly qaqtyǵystarǵa «karantin» jariialaýdyń jáne barlyq kúshti bizdiń ómirimizge bailanysty bolatyn kúreske jumyldyratyn ýaqyt keletinin» málimdedi.
