Birikken Ulttar Uiymy Bas Assambleiasy Ierýsalim qalasyn Izraildiń astanasy dep sanaýdan bas tartty. Bas Assambleia Ierýsalimniń mártebesi týraly AQSh-tyń sheshimin tanymaityny týraly qarar qabyldady. Bul sheshimdi 128 memleket, sonyń ishinde BUU Qaýipsizdik Keńesiniń AQSh-tan ózge turaqty músheleriniń barlyǵy qoldap daýys bergen. Toǵyz memleket qararǵa qarsy daýys berse, 35 el qalys qalǵan.
Buǵan deiin BUU Qaýipsizdik Keńesiniń osyndai mazmundaǵy qararynyń jobasyna turaqty músheleriniń barlyǵy qoldaý bildirip, tek oǵan qarsy bolǵan AQSh veto qoiǵasyn BUU Bas Assambleiasynyń shuǵyl otyrysy shaqyrylǵan. BUU Bas Assambleiasynyń beisenbide qabyldaǵan qararynyń mátini Vashington veto qoiǵan jobada aitylǵandy qaitalaidy.
Qabyldanǵan qararda Ierýsalimdi Izrail astanasy dep tanýdan bas tartýǵa shaqyrǵan, biraq mátinde AQSh atalmaidy. Sonymen birge qujatta Ierýsalimniń mártebesine qatysty BUU Qaýipsizdik Keńesi "qararyna qaishy keletin sheshimderdiń zańdy kúshi bolmaityny" aitylǵan.
Buǵan deiin AQSh prezidenti Donald Tramp Vashington bul qararǵa qoldaý tanytqan elderge qarjylai kómekti shekteitin bolady dep ýáde etken. Palestina biligi AQSh-ty BUU-ǵa múshe elderge "qoqan-loqy kórsetti" dep aiyptaǵan.
Jeltoqsannyń 6-sy kúni prezident Tramp AQSh-tyń Izraildegi elshiligin Tel-Avivten Ierýsalimge kóshirýge daiyndala bastaýǵa pármen bergen. Daiyndyq jumystary úsh jyldan tórt jylǵa deiin jalǵasýy múmkin. Tramptyń sheshimin arab elderiniń kóbi qatty synǵa alyp, Palestina territoriialarynda jappai narazylyq aktsiialary men tártipsizdikter bastalǵan.
Izrail Ierýsalimdi óziniń birtutas jáne bólinbeitin astanasy dep sanaidy. BUU Ierýsalimniń shyǵys bóligi zańsyz basyp alynǵan dep biledi. 1995 jyly AQSh Kongresi Izraildegi amerikalyq elshilikti Ierýsalimge kóshirý týraly zań qabyldaǵan, biraq qalanyń mártebesi daýly bolǵandyqtan, AQSh diplomatiialyq ókildigi Tel-Avivte qalǵan edi. Jaqyn ýaqytqa deiin Vashingtonda Ierýsalim 1948 jyly britandyq mandat merzimi aiaqtalǵan soń esh tarapqa tiesili emes jáne qala mártebesi beibit kelisimge qol qoiylǵannan keiin ǵana anyqtalady degen ustanym bolǵan edi.
