BUU bas hatshysy Antonio Gýtterish búgin, 26 sáýirde Máskeýde Resei syrtqy ister ministri Sergei Lavrovpen kezdesýden soń Ýkrainada gýmanitarlyq dáliz ashý boiynsha kelissóz júrgizetin bailanys toby qurylatynyn málimdedi. Gýtterishtiń sózinshe, bul topqa BUU, Ýkraina jáne Resei ókilderi kiredi, al toptyń jumysyn BUU ókilderi úilestiredi, dep habarlaidy Azattyq.
"Gýmanitarlyq dálizder qaýipsiz bolýy tiis. Beibit turǵyndardy qaýipti aimaqtan qutqarý úshin barlyq tarap gýmanitarlyq dáliz shartyn saqtaýy kerek. Qaqtyǵys aimaqtarynda ashylatyn gýmanitarlyq dálizder shynymen qaýipsiz bolýy úshin gýmanitarlyq suraqtar boiynsha bailanys tobyn qurýdy usyndym" dedi ol.
BUU bas hatshysy eki tarapty taǵy da beibit kelissózderge shaqyrdy.
"Meniń basty maqsatym – adamdardyń ómirin jáne olardy qiyndyqtan qutqarý. Resei SIM basshysy Lavrov myrzamen ashyq kelissóz júrgizdik. Reseidiń Ýkrainaǵa basyp kirýi BUU qararyn buzady. Bul soǵys jyldam aiaqtalǵany Ýkraina halqyna da, Resei halqyna da jáne búkil álemge de jaqsy. Atysty toqtatyp, jaǵdaidy beibit jolmen sheshýge shaqyramyz, biraq bul qazirge múmkin bolmai tur. Qazir Donbassta soǵys jalǵasyp jatyr, áskeriler men beibit turǵyndar arasynda qaza tapqandar bar. Gýmanitarlyq quqyqtar buzyldy degen, áskeri qylmys jasalýy múmkin degen habarlarǵa alańdaimyn" dedi ol.
Gýtterish brifingte "Bir anyǵy, Resei aýmaǵynda qazir Ýkraina áskeri joq, biraq Ýkraina aýmaǵynda Resei áskeri júr" dedi. Al Resei SIM basshysy Sergei Lavrov Gýtterishtiń bul sózin "shyn" dep moiyndady.
BUU bas hatshysy jýrnalisterdiń "Resei Ýkrainada soǵys qylmysyn jasap jatyr" degen kúdikke qatysty suraǵyna "muny táýelsiz tergeýshiler tekserýi tiis" dep jaýap berdi.
Gýterrish búgin, 26 sáýirde Resei prezidenti Vladimir Pýtin jáne osy eldiń syrty ister ministri Lavrovpen kezdesý úshin Máskeýge kelgen edi. Osy kezdesýden soń BUU bas hatshysy Ýkrainaǵa barady dep josparlanǵan.
