BUU bas hatshysy Antonio Gýterrish "álemde turaqsyzdyq kóbeiip, janjaldar dendep barady" dep sanaidy. BUU Bas Assambleiasyna jinalǵandar aldyndaǵy alǵashqy sózinde ol uiym múshelerin Soltústik Koreiamen shielenisti jaǵdaidy soǵysqa deiin jetkizbeýge shaqyrdy. AQSh prezidenti Donald Tramp Bas Assambleiadaǵy sózinde eger Phenian iadrolyq qarýdy damytý nietinen qaitpaityn bolsa, onda áskeri jolmen aralasýǵa týra kelýi múmkin ekeni jaily málimdegen bolatyn.
Gýterrish BUU Qaýipsizdik Keńesi múshelerin Korei túbeginde iadrolyq qarýdan bas tartý máselesinde birlik tanytýǵa shaqyrdy. Ol daǵdarysty beibit jolmen sheshý qajettigin, boikúiezdik pozitsiia qarýly janjalǵa alyp kelýi múmkin ekenin atap aitty.
BUU bas hatshysy saiasatkerlerdiń sailaýshylar qoldaýyna ie bolý úshin bosqyndar men migranttardy jaman etip kórsetetindigine bailanysty alańdaýshylyq bildirdi. Gýterrish qazirgi qyzmetine deiin 10 jyl BUU bosqyndar isi jónindegi joǵary komissary bolyp istegen.
Álem liderleri ǵalamdyq klimat týraly Parij kelisimine sáikes, aýaǵa taraityn ziiandy zattardy bólýdi azaitýǵa barynsha kúsh salýy tiis dep málimdegen Gýterrish. Buǵan deiin AQSh Parij kelisiminen shyǵý protsesin bastaǵan bolatyn. BUU klimattyń ózgerýine qatysty bultartpaityn ǵylymi dálelder bary týraly málimdegen.
