2020 jyldyń alǵashqy úsh aiynda Aýǵanstandaǵy qaqtyǵystardan 500-den astam beibit adam ólgen, 760 adam jaralanǵan. Bul málimet Birikken ulttar uiymynyń 27 sáýirde jariialanǵan baiandamasynda ataldy. Baiandamada Aýǵanstannyń beibit halqyn koronavirýstan qorǵaýdy kúsheitý qajettigi aitylǵan.
Birikken ulttar uiymynyń Aýǵanstan boiynsha missiiasy (UNAMA) málimetine qaraǵanda, biyl 1 qańtar – 31 naýryz aralyǵynda aýǵan konfliktisinde 152 sábi, 60 áiel óltirilgen, 265 bala, 108 áiel jaralanǵan.
Baiandamada aýǵan úkimeti men tálibter kelisimge kele bastaidy degen úmit oiana bastaǵanyna qaramastan sońǵy aida kisi ólimi kúrt kóbeigeni aitylǵan.
Kisi óliminiń 55 paiyzy úkimetke qarsy kúshter - «Talibannan» bastap ekstremistik «Islam memleketi» uiymy men belgisiz sodyr toptar moinyna júkteledi dep kórsetilgen. «Degenmen de balalar óliminiń kóbeiýine Aýǵanstan úkimet kúshteri men shetel áskeriniń is-qimyldary da yqpal etti» deidi UNAMA.
AQSh-tyń Aýǵanstan boiynsha arnaiy elshisi Zalmai Halilzad taiaýda twit-habarlamalarynda koronavirýsqa bailanysty daǵdarys kezinde tálipter zorlyq-zombylyqty azaityp, «shabýyldaryn toqtatýy tiis» dep jazǵan.
