2020 جىلدىڭ العاشقى ٷش ايىندا اۋعانستانداعى قاقتىعىستاردان 500-دەن استام بەيبٸت ادام ٶلگەن, 760 ادام جارالانعان. بۇل مەلٸمەت بٸرٸككەن ۇلتتار ۇيىمىنىڭ 27 سەۋٸردە جارييالانعان بايانداماسىندا اتالدى. باياندامادا اۋعانستاننىڭ بەيبٸت حالقىن كوروناۆيرۋستان قورعاۋدى كٷشەيتۋ قاجەتتٸگٸ ايتىلعان.
بٸرٸككەن ۇلتتار ۇيىمىنىڭ اۋعانستان بويىنشا ميسسيياسى (UNAMA) مەلٸمەتٸنە قاراعاندا, بيىل 1 قاڭتار – 31 ناۋرىز ارالىعىندا اۋعان كونفليكتٸسٸندە 152 سەبي, 60 ەيەل ٶلتٸرٸلگەن, 265 بالا, 108 ەيەل جارالانعان.
باياندامادا اۋعان ٷكٸمەتٸ مەن تەلٸبتەر كەلٸسٸمگە كەلە باستايدى دەگەن ٷمٸت ويانا باستاعانىنا قاراماستان سوڭعى ايدا كٸسٸ ٶلٸمٸ كٷرت كٶبەيگەنٸ ايتىلعان.
كٸسٸ ٶلٸمٸنٸڭ 55 پايىزى ٷكٸمەتكە قارسى كٷشتەر - «تاليباننان» باستاپ ەكسترەميستٸك «يسلام مەملەكەتٸ» ۇيىمى مەن بەلگٸسٸز سودىر توپتار موينىنا جٷكتەلەدٸ دەپ كٶرسەتٸلگەن. «دەگەنمەن دە بالالار ٶلٸمٸنٸڭ كٶبەيۋٸنە اۋعانستان ٷكٸمەت كٷشتەرٸ مەن شەتەل ەسكەرٸنٸڭ ٸس-قيمىلدارى دا ىقپال ەتتٸ» دەيدٸ UNAMA.
اقش-تىڭ اۋعانستان بويىنشا ارنايى ەلشٸسٸ زالماي حاليلزاد تاياۋدا twit-حابارلامالارىندا كوروناۆيرۋسقا بايلانىستى داعدارىس كەزٸندە تەلٸپتەر زورلىق-زومبىلىقتى ازايتىپ, «شابۋىلدارىن توقتاتۋى تيٸس» دەپ جازعان.
