Birikken Ulttar Uiymy kúni qarsańynda ál-Farabi atyndaǵy QazUÝ ál-Farabidiń 1150 jyldyǵyna, BUU-nyń 75 jyldyǵyna, BUU Órkenietter aliansynyń 15 jyldyǵyna jáne BUU «Akademiialyq yqpal» baǵdarlamasynyń 10 jyldyǵyna arnalǵan ǵalamdyq konferentsiia ótkizdi. Konferentsiia Bas hatshy Antonio Gýterrishtiń BUU-nyń 75 jyldyǵyna orai álemdik qoǵamdastyqqa arnaǵan beineúndeýimen ashyldy.
BUU Bas hatshysy úndeýiniń negizgi leitmotivi – beibit ómir úshin birigýge shaqyrý boldy. Jahandyq yntymaqtastyq pen áriptestik adamzat aldynda turǵan orasan zor qiyndyqtardy eńserýge jáne jarqyn bolashaq qurýǵa qolǵabys etedi. Osy negizgi tujyrym men «Beibit ómirge arnalǵan sana» konferentsiiasynyń taqyryby uly oishyl ál-Farabidiń qaiyrymdy qoǵam qurý úshin adamdardy biriktirý ideialarymen úndes.
Halyqaralyq onlain-kezdesýde BUU Bas hatshysynyń orynbasary Fabritsio Hohshild-Drammond, BUU Órkenietter Aliansynyń joǵary ókili Migel Anhel Morratinos, BUU «Akademiialyq yqpal» baǵdarlamasynyń jetekshisi Ramý Damodaran, QR Syrtqy ister vitse-ministri Erjan Ashyqbaev quttyqtaý sóz sóiledi. Ál-Farabidiń shyǵarmashylyq murasyn álemdik azamattyq jáne turaqty damý jónindegi BUU baǵdarlamalarymen sinergiia turǵysynan qarastyrýǵa baǵyttalǵan joǵary deńgeidegi is-shara BUU qurylymdary men baǵdarlamalarynyń basshylary, álemge tanymal ǵalymdar, belgili memlekettik jáne qoǵam qairatkerleri, akademiialyq qoǵamdastyq pen BAQ ókilderiniń basyn qosty.
BUU Bas hatshysynyń orynbasary Fabritsio Hohshild-Drammond pen BUU «Akademiialyq yqpal» turaqty damý baǵdarlamasynyń jetekshisi Ramý Damodaran forým uiymdastyrýshylaryna alǵystaryn bildirip, qazaqstandyqtardy jáne álem qoǵamdastyǵyn órkeniettiń uly oishyly ál-Farabidiń 1150 jyldyǵymen quttyqtady. Sonymen qatar olar 2014 jyldan bastap tórtinshi ret qatarynan BUU-nyń «Akademiialyq yqpal» baǵdarlamasynyń Ǵalamdyq habyn basqaryp kele jatqan jáne osy baǵyttaǵy qazaqstandyq bastamalardy alǵa tartqan QazUÝ-dyń belsendi qyzmetin atap ótti.
«Biyl Qazaqstan Prezidenti Qasym-Jomart Toqaev BUU Bas assambleiasynda sóilegen sózinde jahandyq máselelerdi sheshýde kúsh-jiger biriktirýge arnalǵan birqatar mańyzdy jáne syndarly usynystar jasady. Máselen, biologiialyq qaýipsizdik jónindegi halyqaralyq agenttik pen azyq-túlik qaýipsizdigi jónindegi halyqaralyq uiym qurý jónindegi usynys», – dedi Ramý Damodaran. Spikerdiń pikirinshe, beibit ómirge arnalǵan osy jáne basqa bastamalar álemdik qoǵamdastyqtyń asa úlken nazaryna laiyq.
Niý-Iorkten halyqaralyq onlain-kezdesý qatysýshylaryn qarsy ala otyryp, BUU Órkenietter aliansynyń Joǵary ókili Migel Anhel Morratinos mereitoilyq konferentsiiada barshamen birge bolý ol úshin úlken mártebe ekenin basa aitty. Ál-Farabi: «Tárbiesiz, adamgershilik qaǵidatsyz bilim paidanyń ornyna, ziian keltirýi múmkin» dep aityp ótken. Filosoftyń bul dáieksózi dúniejúzindegi azamattyq bilim berýdiń ǵalamdyq baǵdarlamalaryna senim artýǵa bolatyn negiz. Ál-Farabi atyndaǵy QazUÝ ǵalamdyq azamattyqty qoldai otyryp, uly gýmanist murasyn qabyl aldy. BUU Órkenietter aliansy ýniversitetpen seriktestigin jáne biz birlesip alǵa jyljytatyn ortaq qundylyqtardy maqtan tutady», – dedi Migel Anhel Morratinos.
Akademiialyq qoǵamdastyqtyń atynan negizgi spiker QazUÝ rektory, akademik Ǵalym Mutanov boldy, ol bilim men rýhaniiat integratsiiasy negizinde jastardy álemdik azamattyq pen adamzattyń turaqty damýy rýhynda tárbieleý missiiasy erekshe strategiialyq mádeni áleýeti bar ýniversitetterge júkteletinin atap ótti. BUU baǵdarlamasynyń Ǵalamdyq haby retinde QazUÝ jańa býyn ýniversitetin – «Ýniversitet 4.0» damytýdyń ózindik modelin ázirlep júzege asyrýda. Ol tek ózi úshin ǵana emes, búkil adamzattyń taǵdyry úshin jaýapty, joǵary rýhani-adamgershilik qundylyqtarǵa ie el jáne álem azamattaryn qalyptastyrýǵa baǵyttalǵan. Niý-Iorkte BUU-nyń shtab-páterinde usynylǵan bul modeldi halyqaralyq deńgeide keńinen taratý usynyldy.
Konferentsiiada sonymen qatar Qazaqstan, Qyrǵyzstan, Tájikstan, Ózbekstan boiynsha IýNESKO-nyń Almatydaǵy klasterlik biýrosynyń direktory Krista Pikkat, BUU-nyń Jahandyq kommýnikatsiialar departamentiniń Qazaqstandaǵy ókili Vlastimil Samek, Túrkiiadaǵy Órkenietter Aliansynyń úilestirýshisi Bekir Karlyga, Kastilia-La-Mancha ýniversitetiniń (Ispaniia), Afinanyń Kapodistriia atyndaǵy ulttyq ýniversiteti (Gretsiia) jáne álemdegi basqa ýniversitetterdiń ókilderi sóz sóiledi.
Halyqaralyq kezdesýge qatysýshylar qaýipsizdikti, adamzattyń beibit jáne turaqty damýyn qamtamasyz etý maqsatynda kúsh-jiger biriktirý qajettiligi týraly ortaq pikir bildirdi. Osy oraida, uly filosof ál-Farabidiń gýmanistik murasy erekshe ózektilikke ie ekendigin atady. Bul úderiste jastardyń jáne akademiialyq qoǵamdastyqtyń úlken rólin alǵa tarta otyryp, konferentsiiaǵa qatysýshylar QazUÝ rektorynyń BUU-nyń jahandyq azamattyq tujyrymdamasyna sáikes «Ýniversitet 4.0» deńgeiine qol jetkizý úshin álem ýniversitetterin biriktirý josparyn birlesip qarastyrý týraly usynysyn qoldady.
