Sybailas jemqorlyqqa qarsy is-qimyl agenttigi astanalyq muǵalimder arasynda túsindirý jumystaryn bastady. Negizgi maqsat – jemqorlyq áreketterdiń aldyn alý. Búgingi jiynda burynǵy vitse-ministr Elmira Suhanberdivanyń qylmystyq isi boiynsha arnaiy baiandama jasaldy, dep habarlaidy Sputnik Qazaqstan.
Agenttiktiń tergeýshisi Rinat Aimuqanovtyń aitýynsha, №3 mektep gimnaziiasynda jekemenshik mektepti zańsyz ashý boiynsha sanitarlyq-epidemiologiialyq tekseris júrgizgen. Budan bólek, órt qaýipsizdigi qyzmeti óz saraptamasyn jasaǵan.
"Máselen, 40 kabinettiń 10-y jekemenshik mektepke arendaǵa berilgen. Oǵan qosa, 5 kabinette ara-tura sabaq ótkizilgen. Osylaisha, barlyq oqý kabinetteriniń 20 protsentin jekemenshik mektep paidalanǵan. Sosyn bilim berý mekemelerine qatysty sanitarlyq-epidemiologiialyq normalar buzylǵan. Oqýshylardyń sany tym kóbeiip ketken. Al memlekettik mektepke baryp júrgen balalar jertólede oqýǵa májbúr bolǵan", - dedi Aimuqanov muǵalimdermen bolǵan kezdesýde.
Onyń sózine qaraǵanda, bastapqy áskeri daiyndyq pen uldarǵa arnalǵan tehnologiia pánderi jertólede uiymdastyrylǵan. Al bir synypta otyrǵan balalardyń sany 30-dan asyp ketken.
"Sosyn órt qaýipsizdigi boiynsha biraz tártip buzýshylyq boldy. Atap aitqanda, jekemenshik mektep úshin kabinetter qaita jabdyqtalǵan bolatyn. Sonyń bárin quziretti memlekettik organmen kelispegen. Úsh jyldyń ishinde biraz ana-atana osy memlekettik mektepke óz balasyn bergisi kelgen. Biraq basshylyq oryn joq dep aityp otyrǵan", - deidi Aimuqanov.
Sýhanberdieva men Sheverniiaeva qylmysty qalai jasady?
Qylmystyq materialdarǵa sáikes, burynǵy vitse-ministr Elmira Sýhanberdieva №3 mektep gimnaziiasynyń burynǵy direktory Elena Sheverniaevamen birge zańǵa qaishy áreket jasaǵan. Olar dál sol mekteptiń ǵimaratynda "Tsentralnaia" atty jekemenshik ekonomikalyq mektep ashqan. Sonyń saldarynan memlekettik mektepte oryn azaiyp, basqa balalar oqýǵa qabyldanbady.
"2016 jyly shilde aiynda sol kezdegi Astana qalalyq bilim basqarmasynyń basshysy Senǵaziev Sheverniiaevany shaqyryp, jekemenshik mektepti basqa jerge kóshirip, bosaǵan oryndy №3 mektep gimnaziiasy úshin paidalanýdy usynǵan. Sheverniiaeva ony birden Sýhanberdievaǵa jetkizgen", - delingen materialdarda.
Sodan Sýhanberdieva óziniń qyzmettik ókilettigin paidalanyp, Senǵazievpen sóilesip, jekemenshik mektepke tiispesin degen. Senǵaziev vitse-ministrden aiaq tartyp, atalǵan máseleni ary qarai kótermegen.
Vitse-ministr mektepti basqarýǵa qalai aralasty?
2019 jyldyń basynda Sýhanberdieva senimdi adamdary arqyly jekemenshik mekteptiń jumysyna aralasa bastaidy. Al Sheverniiaeva vitse-ministrdiń qoldaý jasaitynyn bile tura, "Tsentralnaia" mektebiniń uiymdastyrý formasyn aýystyryp, jaýapkershiligi shekteýli seriktestik retinde qurýdy usynady. Sýhanberdieva atalǵan usynyspen kelisken. Osylaisha, ekeýi JShS-ny birge basqarýǵa, tabysty bólýge jáne investitsiiany birlesip salýǵa ýaǵdalasqan. Sýhanberdieva memlekettik qyzmetin paidalanyp, jekemenshik mektepke qoldaý jasaýǵa kelisimin de bergen.
Sýhanberdieva men Sheverniiava JShS-nyń quryltaishysy retinde ózderin emes, týǵan-týystaryn rásimdeýge ýaǵdalasqan. Sóitip, jekemenshik firmanyń quramyna Sýhanberdievanyń týǵan apasy jáne Sheverniiaevanyń anasy endi. Budan bólek, ekeýi jekemenshik mekteptiń jańa ǵimaratyn alý úshin JShS esepshotyna 154 million 523 myń 400 teńge salǵan.
Sottyń sheshimi
2019 jyldyń 10 shildesinde Elmira Sýhanberdieva memlekettik mektepte jekemenshik bilim berý mekemesin ashyp, kásipkerlik qyzmetpen ainalysqany úshin kináli dep tanyldy. Tergeý kezinde Sýhanberdieva men Sheverniiaeva kinásin tolyǵymen moiyndap, óz erkimen protsessýaldy kelisimge keldi. Prokýror vitse-ministrge 2500 ailyq eseptik kórsetkish mólsherinde (6 312 500 teńge), al Elena Sheverniaevaǵa 500 AEK mólsherinde (1 262 500 teńge) aiyppul salýdy usyndy. Budan bólek, jekemenshik mektep direktorynyń kabinetinen tárkilengen 11 475 300 teńgeni memleket menshigine alyp qoiýdy suraǵan. Sýdia Baqytjan Esenov prokýrordyń talabyn qanaǵattandyrdy. Sýhanberdieva memlekettik qyzmette jumys isteý quqyǵynan aiyryldy.
Jýrnalisterge suhbat bergen burynǵy vitse-ministr tergeý abaqtysynda otyrǵanda kitap jazyp shyqqanyn málimdedi. Al 16 kúnnen keiin Elmira Sýhanberdievanyń áriptesteri men blogerler burynǵy vitse-ministrdiń kenje uly qaitys bolǵanyn habarlady.
