Foto: Pexels.com
Ulytaý oblysy Sátbaev qalasynyń turǵyny burynǵy súiiktisine qatysty ar-namysty taptaityn áreketteri úshin sottaldy. Ol qyzdyń jeke sýretteri men hattaryn taratyp, jelide jariialaǵany úshin jaýapqa tartyldy, dep habarlaidy Ult.kz.
Sot materialdaryna sáikes, er adam Telegram messendjerinde arnaiy top quryp, oǵan 22 jastaǵy qyzdyń jaqyndaryn, dostaryn jáne týystaryn qosqan. Osy topta ol jábirlenýshiniń intimdik fotolaryn, jeke hat-habarlaryn jáne qupiia derekterin bólisken. Sondai-aq TikTok-ta jańa akkaýnt ashyp, jábirlenýshiniń daýysyn jazyp, ony beinemazmunmen birge jariialaǵan.
Aiyptalýshy óz kinásin moiyndap, áreketine ókingenin málimdep, jábirlenýshiden keshirim surady.
"Sot anyqtaǵandai, aiyptalýshy burynǵy súiiktisin kópshilik aldynda masqaralaý maqsatynda Telegram jelisinde top qurǵan. Topqa jábirlenýshiniń jaqyndaryn qosyp, onyń eki jalańash fotosyn, jeke hat-habarlaryn jáne qupiia derekterin jariialaǵan. TikTok jelisinde de akkaýnt ashyp, jábirlenýshiniń daýystyq jazbasyn beinemazmunmen qosa jariialaǵan", – dep habarlady Sátbaev qalalyq sotynyń baspasóz qyzmeti.
Aiyptalýshy Qylmystyq kodekstiń 147-babynyń 5-bóligi boiynsha (jeke ómirge qol suǵylmaýshylyqty buzý jáne jeke derekterdi zańsyz taratý) kináli dep tanyldy.
"Sot aiyptalýshynyń kinásin moiyndaýyn, aýyrlatatyn jáne jeńildetetin mán-jailardy eskerip, 3 jylǵa bas bostandyǵynan aiyrý jazasyn belgiledi. Ol jazasyn orta qaýipsizdik deńgeiindegi túzeý mekemesinde óteidi. Sot úkimi ázirge zańdy kúshine engen joq", – dep málimdedi sottyń baspasóz qyzmeti.
