Búgin Astana qalalyq sotynda «Bishimbaev isine» qatysty barlyq figýranttar sońǵy sózderin aitty. Olarlyń ishinde eks-ministr Qýandyq Bishimbaev ta bar, dep habarlaidy QazAqparat.
Aita ketken jón, Q.Bishimbaev bir saǵattan astam ýaqyt sóiledi. Óz sózinde eks-ministr aqsha urlyǵyna qatyspaǵanyn taǵy bir márte málimdedi.
«Men óz elimniń patrioty ekenimdi jaqsy bilemin. Sondyqtan jumys babynda memleket múddesin oilap, Ult kóshbasshysy, Memleket basshysy Nursultan Nazarbaev qoiǵan maqsat-mindetterdi oryndaýǵa tyrystym. Men «Bolashaq» baǵdarlamasy boiynsha AQSh-ta tamasha bilim alyp keldim. Sol úshin óz elime, Memleket basshysyna sheksiz alǵysymdy aitamyn. Qai jerde istesem de, elimizge, Memleket basshysy Nursultan Nazarbaevqa paidaly bolýǵa tyrystym. Meniń otbasym da solai tárbieledi. El múddesine degen adaldyq, Memleket basshysyna degen adaldyq - maǵan berilgen tárbieniń basty ózegi. Meniń atam, ákem, anam ómiriniń basym bóligin Otanyna, ǵylym men bilimdi damytýǵa arnady. Olar meni bilimge, eńbekke adal bolýǵa úiretti. Al meniń barlyq jetistikterim «Bolashaq» baǵdarlamasy aiasynda alǵan bilim men qajyrly eńbektiń arqasy», – dedi Q.Bishimbaev.
Eks-ministr Memleket basshysy Nursultan Nazarbaevtan taǵy bir márte keshirim surady. Prezidenttiń jastarǵa degen oń kózqarasy arqasynda qarapaiym bank qyzmetkerinen ministrge deiin kóterilgenin de jetkizdi.
Sondai-aq Q.Bishimbaev 1,1 mlrd teńgeni urlamaǵanyn, shyny zaýytynyń ýaqytynda salynbaǵany úshin bank-garant 4,5 mlrd teńgege jýyq aqshany tólep bergenin aityp ótti.
«Men eshqandai para alǵan joqpyn. Qurmetti sot, meni aqtaýdy suraimyn», - dep atap kórsetti ol.
Aita keteiik, ótken jyldyń basynda eks-ministr Qýandyq Bishimbaev qamaýǵa alynǵan bolatyn. Tergeý materialdaryna sáikes, Q.Bishimbaev «Báiterek» ulttyq holdinginiń basshysy bolyp turǵanda Qyzylorda qalasyndaǵy shyny zaýytynyń bir milliard teńgesin talan-tarajǵa salǵan. Atalǵan qarjy «Orda Glass» JShS jáne oǵan qarasty «Shymkenthimmontaj» JShS arqyly urlandy.
Budan bólek, eks-ministr «Nurly jol» baǵdarlamasyna qatysqan qurylys kompaniialarynan aqsha alǵany úshin aiyptalyp otyr. Osy iske qatysy bar birqatar azamattar óz kinásin moiyndady. Alaida Qýandyq Bishimbaev ózine taǵylǵan aiyppen kelispei otyr. Buǵan deiin ol Prezidenttiń aldynda kináli ekenin jetkizdi. Memlekettik aiyptaýshy ony 12 jylǵa sottaý qajet dep sanaidy.
