Osy maqsatqa qordan 5 mlrd. teńgege jýyq qarjy bólinip, birjolǵy materialdyq kómekke baǵyttalady. Elbasynyń tapsyrmasy boiynsha Nursultan Nazarbaev Qorynyń qoldaýymen qarajat qordyń shotyna tústi, dep habarlaidy "Ult aqparat".
Keshe Nursultan Nazarbaev búkil el boiynsha taǵy 100 myń áleýmettik az qamtylǵan otbasyna 50 myń teńge kóleminde qosymsha ataýly tólemder uiymdastyrýdy tapsyrǵan bolatyn.
«Birgemiz» qorynyń tóraǵasy Rýslan Sakeevtiń aitýynsha, 100 myńnan astam azamat birjolǵy materialdyq kómekpen qamtylady. Kómek qarajatty alýshylardyń 7 sanaty bekitilgen.
Olardyń qatarynda turmysy tómen kópbalaly otbasylar, muqtaj múgedekter, múgedek balany tárbielep otyrǵan otbasylar, eń tómengi zeinetaqy alatyn jáne halyqtyń áleýmettik álsiz tobyna jatatyn zeinetkerler, jetim balalar (tul jetim balalar men asyraýshysynyń birinen airylǵan balalar), Ekinshi dúniejúzilik soǵysqa qatysýshylary men múgedekter jáne solarǵa teńestirilgender, tyl eńbekkerleri bar.
«Bul rette biz buryn kómek kórsetilmegen azamattardyń alýyn qadaǵalaimyz», - dedi qor tóraǵasy.
Onyń aitýynsha, kómek alýshylardyń tizimin burynǵydai ákimdikter usynady.
Sondai-aq, R.Sákeev qazirgi tańda osy baǵytta óńirlermen qarqyndy jumys júrgizilip jatqanyn jáne azamattarǵa birjolǵy kómek jaqyn kúnderi beriletinin atap ótti.
Esterińizge sala keteiik, «Birgemiz» qory osy jyldyń naýryz aiynda Tuńǵysh Prezident, «Nur Otan» partiiasynyń Lideri Nursultan Nazarbaevtyń bastamasymen koronavirýspen kúres jaǵdaiynda halyqtyń áleýmettik osal toptaryn qoldaý úshin qurylǵan bolatyn.
Osy ýaqyt ishinde qor qarajatynan 550 myńnan astam muqtaj azamat 50 myń teńgeden aldy. Pandemiiamen kúreste aldyńǵy shepte bolǵan elorda men Almaty qalasynyń 2112 meditsina qyzmetkerine birjolǵy tólem jasaldy.
Pandemiia bastalǵan kezeńde Nur-Sultan, Almaty jáne Shymkent qalalaryndaǵy áleýmettik álsiz 100 myń otbasyǵa 5 mln maska taratyldy.
Sonymen qatar, qor esebinen Túrkistan oblysynyń Maqtaaral aýdanyndaǵy Myrzakent aýylynda 20 úidiń qurylysy aiaqtaldy. Qazirgi ýaqytta 12 úidiń qurylysy jalǵasýda.
